Гимнастикачимиз Гиннеснинг рекордлар китобига киритилди
  • 16 Декабрь 2016

Гимнастикачимиз Гиннеснинг рекордлар китобига киритилди

Ҳамюртимиз Оксана Чусовитина Олимпия ўйинларида кетма-кет етти бор иштирок этган жаҳондаги ягона гимнастикачи аёл сифатида Гиннеснинг рекордлар китобига киритилди.

Тажрибали спортчимиз бундай нуфузли мусобақада дастлаб 1992 йил Барселонада қатнашган ва жамоавий баҳслар якунига кўра, Олимпия ўйинларининг олтин медали билан тақдирланган эди. 41 ёшли гимнастикачи учун “Рио — 2016” беллашувлари еттинчи Олимпиада бўлди. Бундай кўрсаткичга дунё спорт гимнастикачилари орасида ҳали ҳеч ким эриша олмаган. Оксана, шунингдек, Пекинда ўтказилган тўрт йилликнинг энг нуфузли мусобақасида кумуш медални қўлга киритган. Унинг профессионал спортдаги фаолияти 25 йилдан бери давом этаётган бўлиб, бу ҳам спорт гимнастикаси тарихида мутлақ рекорд натижа ҳисобланади.

Чусовитина уч карра жаҳон чемпионлиги, Европа чемпионлиги ва Осиё ўйинлари ғолиблигига ҳам эришган. Қолаверса, у жаҳон чемпионатларининг тўрттадан кумуш ва бронза медалларини қўлга киритган.

Оксана ҳали катта спорт билан хайрлашиш ниятида эмаслигини маълум қилган. Ҳамюртимиз келгуси йили Монреалда бўладиган жаҳон чемпионатида иштирок этиш истагида.

Ш. ЗОКИРЖОНОВ тайёрлади.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn