Янги спорт мажмуаси
  • 17 Ноябрь 2016

Янги спорт мажмуаси

Ўзбекистон Болалар спортини ривожлантириш жамғармаси ташкил этилганидан буён ўтган давр мобайнида Наманган шаҳрида 25 та спорт иншооти фойдаланишга топширилди. Эндиликда улар қаторига вилоят марказидаги 2-Болалар ва ўсмирлар спорт мактаби учун бунёд этилган янги мажмуа ҳам қўшилди.

Бу ерда ўғил-қизларнинг жисмоний етуклик машғулотлари билан шуғулланиши учун барча шароит яратилган. Жумладан, бадиий гимнастика, бокс, дзюдо, бадминтон, кураш, ўзбек жанг санъати, каратэ-до, таэквондо ITF сингари ўнга яқин спорт турларига мўлжалланган зал ва майдонлар бир вақтнинг ўзида 360 нафар ўқувчига хизмат кўрсатади. Бундан ташқари, мажмуадан ювиниш ҳамда кийиниш, услубият, ўқув-амалиёт, маънавият ва маърифат хоналари ҳам ўрин олган. Куни кеча ёшлар ихтиёрига топширилган мазкур иншоот қурилиши ҳамда жиҳозлаш ишларига жамғарманинг 3 миллиард 300 миллион сўм миқдоридаги маблағи йўналтирилди. 

Айтиш лозимки, шаҳардаги бундай муассасаларда айни пайтда 28 мингдан зиёд ўғил-қизлар спортнинг 30 тури билан мунтазам шуғулланмоқда. Маҳорат сабоқларини муваффақиятли ўзлаштираётган ана шу ёшлар ўтган йилнинг ўзида халқаро турнирларда 139 та, мамлакат миқёсидаги мусобақаларда 396 та олтин медални қўлга киритди.

Қудратилла НАЖМИДДИНОВ,

«Халқ сўзи» мухбири.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn