Самарқанд — йирик мусобақалар мезбони
  • 29 Сентябрь 2016

Самарқанд — йирик мусобақалар мезбони

Самарқандда байдарка ва каноэда эшкак эшиш бўйича Осиё очиқ кубоги ҳамда параканоэ бўйича Осиё чемпионати бошланди.

Самарқанд эшкак эшиш каналида ўтказилаётган мусобақаларнинг очилиш маросимида Осиё каноэ федерацияси президенти Шокин Нарита ва бошқалар мамлакатимизда спортни оммалаштириш ҳамда уни янада ривожлантириш бўйича олиб борилаётган ишлар ва кейинги йилларда эришилаётган натижалар тўғрисида фикр юритди. Айниқса, ХXXI ёзги Олимпия ҳамда XV Паралимпия ўйинларида Ўзбекистон спортчилари эришган ютуқлар юксак эътибор ва ғамхўрлик -самараси эканлиги алоҳида эътироф этилди.

Таъкидлаш керакки, Марказий Осиёда ягона ҳисобланган Самарқанддаги эшкак эшиш канали 2009 — 2012 йилларда тўлиқ реконструкция қилинди. Амалга оширилган бунёдкорлик ишларидан сўнг ушбу иншоотда халқаро даражадаги беллашувларни ҳам ўтказиш имконияти юзага келди. Айни пайтда мазкур мажмуада 100 ўринли меҳмонхона, 64 ўринли ошхона, шунингдек, мажлислар зали, ҳакамлар хонаси ҳамда бошқа ёрдамчи хоналар мавжуд. Қирғоқда эса 2 минг томошабинга мўлжалланган ўриндиқлар ўрнатилган. Старт ва финиш чизиқлари замонавий электрон тизим билан таъминланиб, халқаро талаблар даражасига келтирилди.

— Яратилган бундай шароит натижасида юртимиз спортчилари байдарка ҳамда каноэда эшкак эшиш бўйича халқаро турнирларда муваффақиятли қатнашиб келмоқда, — дейди Самарқанд вилояти маданият ва спорт ишлари бошқармаси бошлиғининг ўринбосари Шуҳрат Рўзиев. — Қитъамизнинг 14 давлатидан 200 дан зиёд спортчилар иштирок этаётган мазкур беллашувларда ҳам вакилларимиз совринли ўринларни қўлга киритади, деган умиддамиз.

Мусобақаларнинг очилиш маросимида Самарқанд вилояти ҳокими З. Мирзаев сўзга чиқди.

Мамадиёр ЗИЁДИНОВ,

«Халқ сўзи» мухбири.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn