Олимпиадага яна бешта йўлланма
  • 19 Апрель 2016

Олимпиадага яна бешта йўлланма

Ўтган ҳафта юртимиз спортчилари учун сермаҳсул кечди.

Жумладан, таэквондо (ВТФ) бўйича Филиппин пойтахти Манила шаҳрида ташкил қилинган Осиё саралаш мусобақасида терма жамоамиз аъзолари муваффақиятли иштирок этдилар. Никита Рафалович (-80 кг.) ва Нигора Турсунқулова (-67 кг.) беллашувларнинг финалигача етиб бориб, совриндор бўлди ҳамда XXXI ёзги Олимпиада ўйинларида қатнашиш ҳуқуқини қўлга киритди. 

Спорт гимнастикасидан тажрибали вакилларимиз Антон Фокин ва Оксана -Чусовитина эса Бразилиянинг Рио-де-Жанейро шаҳри мезбонлик қилган, тўрт йилликнинг энг нуфузли мусобақасига лицензия бериладиган турнирда маҳорат кўрсатиб, Олимпиадада иштирок этиш имкониятига эга бўлишди. 

Стол теннисидан Зоҳид Кенжаев ҳам Гонконгдаги беллашувда муваффақиятли қатнашиб, “Рио — 2016” иштирокчилари сафига кўшилди. У эркаклар ўртасида илк бор мазкур спорт тури бўйича Олимпиадада мамлакатимиз шарафини ҳимоя қилади.

Маълумот ўрнида айтиб ўтамиз, шу кунгача Бразилияда бўладиган Олимпиада ва Паралимпиада ўйинларига йўлланма олган Ўзбекистон спортчилари сони 65 нафарга етди. Яқин вақт ичида улар сафи янада кенгайиши, шубҳасиз.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn