35 сонияда эришилган ғалаба
  • 03 Май 2017

35 сонияда эришилган ғалаба

Пойтахтимиздаги “Ўзбекистон” спорт мажмуасида бокс бўйича бўлиб ўтаётган Осиё чемпионати мухлисларга ҳаяжонли ва завқли онларни тақдим этмоқда.

Биз газетамизнинг аввалги сонида Ҳасанбой Дўсматов, Исроил Мадримов ҳамда Санжар Турсунов мусобақадаги дастлабки жангини ўтказгани ҳақида хабар қилган эдик. Келинг, навбатдаги кун баҳслари тўғрисида сўз юритишдан аввал ана шу беллашувлар натижалари хусусида маълумот берсак.

Мазкур қитъа чемпионатининг энг номдор иштирокчиси, шубҳасиз, Олимпия чемпиони, Вэл Баркер кубоги соҳиби, Халқаро бокс ассоциацияси (AIBA) версияси бўйича 2016 йилнинг энг яхши боксчиси Ҳасанбой Дўсматовдир. Ҳамюртимиз мусобақага иккинчи саралаш босқичидан киришди. Унинг илк рақиби Шри-Ланка вакили Паллеха Тиванка бўлди. Уч раунд давом этган жангда, кутилганидек, Ҳасанбой тўлиқ устунликни қўлига олди ва ғалаба қозонди. Юртдошимиз навбатдаги босқичда қозоғистонлик Жомарт Ержанга қарши рингга кўтарилади.

75 килограмм вазн тоифасида қатнашаётган иқтидорли спортчимиз Исроил Мадримовнинг фаластинлик Қосим Абудабаатни енгиши учун атиги 35 сония кифоя қилди. У биринчи раунддаёқ рақибини техник нокаутга учратди. Боксчимиз чорак финалда филиппинлик Марсиал Эумирга қарши жанг олиб боради.

Яна бир қувончли хабар 91 килограмм вазн тоифасида Ватанимиз шарафини муҳофаза этаётган Санжар Турсунов билан боғлиқ. У Жанубий кореялик Ким Хёнгкю устидан зафар қучди.

Кеча Ўзбекистон терма жамоасининг тўрт нафар вакили рингга кўтарилди. Жумладан, кундузги дастурдан ўрин олган баҳслардан бири Элнур Абдураимов ва филиппинлик Жеймс Палисте ўртасида кечди. Унда ҳамюртимиз муваффақиятга эришди. 

XXXI ёзги Олимпия ўйинлари совриндори Шаҳрам ўиёсов эса иорданиялик Зиёд Эашашдан устун келди. Шунингдек, номдор боксчиларимиздан бири Бектемир Мелиқўзиев эронлик Амин Зядини дастлабки раунддаёқ мағлуб этиб, кейинги босқич масаласини ҳал қилди. Жасурбек Латипов эса Қирғизистон терма жамоаси аъзоси Азат Усеналиевни енгди.

Шавкат ОРТИҚОВ тайёрлади.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn