Ўзбекистон Иқлим ўзгариши бўйича Париж битимига қўшилди
  • 21 Апрель 2017

Ўзбекистон Иқлим ўзгариши бўйича Париж битимига қўшилди

Жорий йил 19 апрель куни Бирлашган Миллатлар Ташкилотининг Нью-Йоркдаги қароргоҳида 2015 йил 12 декабрда қабул қилинган Париж битимини Ўзбекистон имзолашига бағишланган маросим бўлиб ўтди.

Битимни мамлакатимиз номидан Ўзбекистон Республикасининг Америка Қўшма Штатларидаги Фавқулодда ва мухтор элчиси Бахтиёр ўуломов имзолади. Ҳужжатни имзолаш маросимида БМТ томонидан Ташкилот Котибияти Ҳуқуқшунослик бошқармасининг Шартномалар секцияси раҳбари С. Виллалпандо иштирок этди.

БМТ вакили ушбу ҳужжатни имзолагани билан Ўзбекистонни қутлади. У иқлим ўзгариши масалалари ҳамиша ташкилотнинг ва жаҳон ҳамжамиятининг диққат-эътиборида бўлишини ҳамда мазкур битимнинг ҳаётга татбиқ қилиниши Барқарор ривожланиш мақсадларига эришиш учун улкан аҳамият касб этишини таъкидлади. 

Маросим чоғида томонлар ҳавога чиқариладиган зарарли чиқиндилар ҳажмини қисқартиришга ҳамда иқлим ўзгаришига нисбатан барқарорликни мустаҳкамлаш имконини берадиган Париж битими БМТга аъзо давлатлар учун ўзига хос “йўл харитаси” бўлиб хизмат қилишига умид билдирди.

Шу куннинг ўзида Ўзбекистон Париж битимини имзолаган мамлакатлар рўйхатига киритилгани ҳақида ахборот материали тайёрланиб, БМТ Котибияти томонидан ташкилотга аъзо давлатлар ўртасида тарқатилди. Ҳужжат имзоланганидан сўнг Битимнинг асл нусхаси сақлаш учун мазкур вазифа ижроси ташкилот Бош котиби мутасаддилигида бўлган БМТ Депозитарийсига тақдим этилди.

Бизнинг маълумот: Париж битими иқлим ўзгариши, 2020 йилдан атмосферада иссиқлик газлари миқдорини камайтириш юзасидан чора-тадбирларни тартибга солиш бўйича Бирлашган Миллатлар Ташкилотининг дастлабки Конвенцияси доирасида қабул қилинган ҳужжат ҳисобланади. Мазкур битим 2015 йил 12 декабрда Парижда бўлиб ўтган Иқлим бўйича конференцияси чоғида Киото протоколининг ривожи сифатида қабул қилинган. Битимдан кўзланган мақсад БМТнинг иқлим ўзгариши бўйича дастлабки -Конвенцияси “ҳаётга татбиқ этилишини фаоллаштириш”, хусусан, ҳароратнинг глобал ўсишини Цельсий шкаласи бўйича ўртача 2°C даражадан паст ҳолатда ушлаб туриш ва  ҳарорат ўсиши Цельсий шкаласи бўйича 1,5 даражада чекланиши учун саъй-ҳаракатларни ишга солиш билан изоҳланади. 

«Жаҳон» АА.

Нью-Йорк

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn