Халқ маслаҳатчилари институти ва одил судлов
  • 27 Март 2014

Халқ маслаҳатчилари институти ва одил судлов

Мамлакатимизда мустақилликнинг дастлабки йилларидан бошлаб суд ҳокимияти мустақиллигини таъминлаш, уни фуқароларнинг ҳуқуқ ва эркинликларини ишончли ҳимоя қила оладиган мустақил давлат институтига айлантиришга қаратилган кенг кўламли ислоҳотлар амалга оширилмоқда.

Хусусан, суд тизимида жамоатчилик вакиллари иштирокини таъминлашга қаратилган ишлар изчил давом эттирилаётир. Бунинг самараси ўлароқ, бугун халқ маслаҳатчилари институти шаклланди ҳамда жамоатчилик вакиллари жиноят ишлари муҳокамасида фаол иштирок этмоқда.
Олий суд ҳузуридаги Тадқиқот маркази томонидан ҳамкорлар билан биргаликда ташкил этилган “Жиноят ишларини кўришда халқ маслаҳатчиларининг иштироки ва суд амалиётидаги долзарб масалалар” мавзуидаги давра суҳбатида шу хусусда атрофлича сўз юритилди. Тадқиқот  маркази томонидан ўтказилган мониторинг натижалари тақдимотига бағишланган тадбирда парламент қуйи палатаси депутатлари, судьялар, прокурорлар, адвокатлар, халқ маслаҳатчилари, амалиётчи мутахассислар ва оммавий ахборот воситалари ходимлари қатнашди.
Эътироф этилганидек, мамлакатимизда халқ маслаҳатчилари институтининг ҳуқуқий асоси яратилган. Ўзбекистон Республикасининг Жиноят-процессуал кодекси, “Судлар тўғрисида”ги Қонун ва “Судьяларнинг малака ҳайъатлари тўғрисида”ги низомда ушбу масала ўз аксини топган. Бу эса амалда одил судловни тўла рўёбга чиқариш имконини бермоқда.
— Халқ маслаҳатчиларининг жиноят ишларини кўришдаги иштирокини янада кенгайтириш, бунинг учун эса фуқаролар ҳуқуқий онги ва маданиятини бугунги кун талаби даражасида юксалтиришни ҳаётнинг ўзи тақозо этмоқда, — дейди Олий суд ҳузуридаги Тадқиқот маркази бўлим бошлиғи Мухтор Ҳакимов. — Шундан келиб чиққан ҳолда, Тадқиқот маркази томонидан халқ маслаҳатчилари институти фаолияти юзасидан мониторинг ўтказилиб, ушбу институтни тартибга солувчи норматив-ҳуқуқий ҳужжатлар, шунингдек, халқ маслаҳатчиларининг суд ишларини кўришдаги иштироки ва шу масала билан боғлиқ хорижий тажриба ҳамда судьялар ўртасида мазкур масала юзасидан ташкил этилган ижтимоий сўров натижалари, жиноят ишини маслаҳатчилар иштирокида кўришда юзага келаётган ташкилий-ҳуқуқий жиҳатлар ўрганилди. Йиғилиш иштирокчилари мониторинг натижаларини юқори баҳолашди.
Тадбирда халқ маслаҳатчилари сайловини ўтказиш, уларнинг ўқувини ташкил этиш, жиноят ишларини кўришдаги иштирокини кучайтириш ҳамда халқ маслаҳатчилари институтига оид қонунчиликни янада такомиллаштириш каби қатор долзарб масалалар ҳам кўриб чиқилди.
Якунда муҳокама этилган масалалар юзасидан тегишли тавсиялар ишлаб чиқилди.

Зокир ХУДОЙШУКУРОВ,
«Халқ сўзи» мухбири.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn