Увайсий ижодий мероси кенг ўрганилаяпти
  • 18 Апрель 2017

Увайсий ижодий мероси кенг ўрганилаяпти

Президентимиз Шавкат Мирзиёев жорий йил 25 март куни пойтахтимизнинг Юнусобод туманидаги обод манзиллардан бири — Увайсий номидаги маҳаллага ташриф буюрганида, Жаҳон отин Увайсий ижодий меросини ўрганиш учун шоиранинг туғилган юрти — Марғилон шаҳрига бориб, илмий-адабий жамоатчилик вакиллари билан ижодий ҳамкорлик қилиш зарурлигини таъкидлаган эди.

Яқинда пойтахтимиздаги Увайсий номидаги маҳалла фуқаролар йиғинининг бир гуруҳ фаоллари Фарғона вилоятида бўлиб, Марғилон шаҳридаги шоиранинг уй-музейи ва вилоятнинг диққатга сазовор жойларига борди. 

Шоиранинг уй-музейида фарғоналик шоир-ёзувчилар, олимлар ва ёш тадқиқотчилар иштирокида илмий-амалий анжуман бўлиб ўтди. Вилоятдаги  “Олтин қалам” ва “Жаҳон отин Увайсий” адабий тўгараги аъзоларининг шеърий чиқишлари барчада катта таассурот қолдирди.

Тадбирнинг дастлабки кунида меҳмонлар вилоят ҳокимлиги ва кенг жамоатчилик вакиллари ҳамроҳлигида қадимий шаҳарнинг муқаддас қадамжолари билан яқиндан танишдилар. Назм ва наво тадбирида таниқли санъаткорлар, аскиячилар, фольклор-этнографик жамоалар иштирокида мусиқали дастур ташкил этилди.

Иккинчи куни Увайсий маҳалласи фаоллари Фарғона шаҳридаги Аҳмад ал-Фарғоний номидаги истироҳат боғи, Ислом Каримов номидаги театр-концерт саройи, янги қад ростлаган “Нуронийлар маскани”, шаҳар драма театри ва шоирлар хиёбони сингари бунёдкорлик ва ободлик шукуҳи акс этган масканларни бориб кўрдилар.

Элёржон ЭҲСОНОВ,

«Халқ сўзи» мухбири.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn