Маънавий тарбия маскани
  • 28 Март 2015

Маънавий тарбия маскани

Пойтахтимизда Халқаро театр кунига бағишлаб театрлаштирилган бадиий кеча бўлиб ўтди.

Ўзбекистон Республикаси Маданият ва спорт ишлари вазирлиги, “Ўзбектеатр” ижодий-ишлаб чиқариш бирлашмаси томонидан уюштирилган мазкур тадбирда тегишли вазирлик ҳамда идоралар вакиллари, санъатшунос олимлар, актёрлар, олий таълим муассасалари профессор-ўқитувчилари ҳамда талабалар қатнашди.
Мамлакатимизда театрлар фаолиятини ривожлантириш, уларнинг репертуарини бадиий юксак спектакллар билан бойитиш, шунинг баробарида, ушбу масканларнинг моддий-техник базасини мустаҳкамлаш, ижодкорларни қўллаб-қувватлаш ва меҳнатини муносиб рағбатлантириш юзасидан тизимли ишлар амалга оширилмоқда. 1998 йил 26 мартда қабул қилинган “Ўзбекистон театр санъатини ривожлантириш тўғрисида”ги Фармон бу борада муҳим аҳамият касб этаяпти.
Таъкидлаш керакки, сўнгги йилларда юртимизнинг барча ҳудудида бири-биридан кўркам, миллий ва замонавий архитектура уйғунлигида барпо қилинган санъат масканлари фойдаланишга топширилди. Кўплаб театрлар янги қиёфа касб этиб, ижодкорларнинг жаҳон андозалари асосида меҳнат қилишлари учун зарур қулайликлар яратилди. Соҳага ихтисослаштирилган таълим муассасаларида ёш иқтидор эгаларининг ижодий салоҳиятини ошириш имкониятлари кенгайди.
Тадбирда қайд этилганидек, ўтган йили республикамиздаги мавжуд театрларда турли мавзу ва жанрларда 140 дан ортиқ янги асарлар саҳналаштирилиб, томошабинлар эътиборига ҳавола қилинди.
Шунингдек, 2014 йил 22 январда қабул қилинган “Ўзбек Миллий академик драма театрининг 100 йиллигини нишонлаш тўғрисида”ги қарор ижроси доирасида мамлакатимиз бўйлаб қатор тадбирлар амалга оширилди. Бундан ташқари, ёш ижодкорларнинг “Дебют — 2014” V Республика театр санъати кўрик-фестивали, пойтахтимизда илк маротаба ўтказилган “Competizione dell‘Opera” ёш опера ижрочиларининг XIV халқаро танлови юртимиз жаҳоннинг энг равнақ топган санъат ва маданият марказларидан бири эканлигини исботлаб берди.
Тадбирда театр фахрийларига ташкилотчилар томонидан совғалар топширилди. Санъат усталари ижросида концерт дастури намойиш этилди.

Дилмурод СОДИҚОВ,
«Халқ сўзи» мухбири.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn