Ҳам ибрат, ҳам ҳавас
  • 05 Ноябрь 2017

Ҳам ибрат, ҳам ҳавас

Халқимизнинг оташқалб фарзанди Шароф Рашидовнинг 100 йиллигига бағишлаб Чирчиқ шаҳрида ўтказилган адабий-бадиий кеча барчада катта таассурот қолдирди. Маърифий тадбир иштирокчилари Шароф Рашидовнинг серқирра фаолияти билан яқиндан танишдилар. Энг оғир дамларда мамлакатимизни бошқариб, юртимиз тараққиётига қўшган беқиёс ҳиссаси ҳақида аниқ тасаввурга эга бўлдилар.

Адибнинг ҳаёти ва ижоди, ёзган асарлари тарихига оид ёдномалар ҳеч кимни бефарқ қолдирмади. Ана шундай хотиралардан бирида, турмуш ўртоғи Хурсаной аядан дугоналари: “Туғилган кунингиз қачон?” деб сўрашганда, ая: “Улар билан ўтказган ҳар куним менинг таваллуд айёмимдир”, деб жавоб бергани кўпчиликда ибратли ўй-кечинмаларни уйғотди.

Айтиш жоизки, улуғ зотнинг “Дугоналар, бормисиз, омонмисиз, Жам бўлишиб, очилиб гулзормисиз?” мисраларига басталанган қўшиқ ҳанузгача халқимиз томонидан севиб куйланади.

— У кишининг оналари тенгдош аёлларга ва сингилларга дугоналар, деб мурожаат қилар эканлар, — дейди Чирчиқ давлат педагогика институти ўқитувчиси Мафтуна Қурбонова. — Оила қўрғонидаги ўзаро муносабатлар ҳам самимияти билан ҳайратга солади. Ана шундан руҳланган устоз юртимизнинг барча аёллари бир-бирларига дугонадай меҳрибон, ҳамдард ва ҳамнафас бўлишларини истаб, ушбу ашъорни битган бўлсалар, ажаб эмас.

Тадбирда Шароф Рашидовнинг азиз номи Ватанимиз тарихидан муносиб ўрин эгаллаганлиги, авлодлар томонидан ҳурмат ва ғурур билан ёдга олинаётгани таъкидлаб ўтилди.

Раҳматилла ШЕРАЛИЕВ,

«Халқ сўзи» мухбири.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn