Мамлакатимизда Тожикистон маданияти кунлари
  • 12 Октябрь 2017

Мамлакатимизда Тожикистон маданияти кунлари

Шу муносабат билан Тожикистон Республикаси маданият вазирининг биринчи ўринбосари Ибодулло Машрабов раҳбарлигида бир гуруҳ санъат ва маданият намояндалари мамлакатимизда меҳмон бўлиб турибди.

— Ушбу маданият кунларидан кўзланган асосий мақсад икки халқ ўртасидаги адабий, мусиқий, маданий ҳамкорликни янада мустаҳкамлашдан иборат, — дейди И. Машрабов. — Бу анжуманга мамлакатингизда катта қизиқиш билдирилиб, барча шарт-шароит яратиб берилганидан беҳад мамнунмиз. 

Икки қардош халқнинг муштарак томонлари кўп. Бу маданият кунларининг дастлабки тадбири — Ўзбекистон тасвирий санъат галереясида бўлиб ўтган “Замонавий Тожикистон” деб номланган фотокўргазма ва тожик халқ ҳунармандчилиги маҳсулотлари намойишида ҳам ўз ифодасини топди. 

Алишер Навоий номидаги Ўзбекистон давлат академик катта театрида Тожикистон маданияти кунлари очилиши муносабати билан ташкил этилган маросимда сўзга чиққанлар халқларимиз ўртасидаги дўстлик алоқалари барча соҳада ривожланиб бораётганини таъкидлашди.

Адабий-мусиқий тадбирда томошабинлар тожикистонлик қардошларимизнинг бой мусиқий мероси намуналаридан баҳраманд бўлди. Тожик миллий куй-қўшиқлари ташриф буюрганларга хушкайфият бағишлади.

Маданият кунлари доирасида меҳмонлар пойтахтимиздаги диққатга сазовор масканларда ҳам бўлиб, истиқлол йилларида юртимизда амалга оширилаётган улкан бунёдкорлик ишлари билан яқиндан танишмоқдалар.

О. ЛУТФУЛЛАЕВ.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn