Назм бўстонида халқона оҳанг
  • 02 Август 2017

Назм бўстонида халқона оҳанг

Ўзбек бахшичилик мактабининг тўрт забардаст вакили  — Ислом шоир Назар ўғли, Эргаш Жуманбулбул ўғли, Фозил Йўлдош ва Муҳаммадқул Жомурод ўғли — Пўлкан шоир Самарқандда яшаб, ижод қилган улкан сўз санъаткорлари сифатида маълум ва машҳур. Куни кеча вилоят марказидаги Шоирлар боғида уларнинг реставрация қилинган ҳайкаллари очилиш маросими бўлиб ўтди.

Тантанали тадбирда сўзга чиққанлар истиқлол йилларида мамлакатимизда ижод аҳлини қўллаб-қувватлаш ва муносиб рағбатлантириш, эл суйган шоир ва адиблар хотирасини абадийлаштириш борасида қилинаётган ишларга юксак баҳо берди. Хусусан, бахшиларимиз меросини ўрганиш, тарғиб қилишга алоҳида эътибор қаратилиши миллий маънавиятимиз ривожига хизмат қилаётир. 

Президентимиз Шавкат Мирзиёев ташаббуси билан Шоирлар боғида атоқли халқ бахшилари ҳайкали ўрнатилиши ҳам бу жабҳадаги эзгу саъй-ҳаракатларнинг амалий ифодасидир. 

— Ўзбек халқ оғзаки ижоди намуналари ранг-баранглиги, мавзулари серқирралиги ҳамда юксак тарбиявий аҳамиятга эгалиги билан ажралиб туради, — дейди тадбирда иштирок этган ёш бахши Аҳрор Пардаев. — Қолаверса, уларда ўтмишимиз, қадимий урф-одатларимиз, азалий қадриятларимиз мужассам. Шу боис достону термаларимизнинг ёш авлод камолотидаги ўрни ва аҳамияти беқиёс. “Шарқ тароналари” ўн биринчи халқаро мусиқа фестивали олдидан Регистон майдонига туташ сўлим боғда ўзбек бахшчилик мактабининг ушбу тўрт нафар дарғаси сиймосига ҳайкал қўйилиши маънавиятимизга бўлган юксак эҳтиром рамзидир. 

Маросимда Сурхондарё, Қашқадарё вилоятларидан келган бахшилар Ислом шоир, Эргаш Жуманбулбул ўғли, Фозил Йўлдош, Муҳаммадқул Жомурод ўғли — Пўлкан шоир айтган достонлардан намуналар ижро этишди.

Тадбирда Самарқанд вилояти ҳокими вазифасини бажарувчи Т. Жўраев сўзга чиқди.

Мамадиёр ЗИЁДИНОВ,

«Халқ сўзи» мухбири.

Алишер ИСРОИЛОВ (ЎзА) олган сурат.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn