XS.UZ
Ўзбекистон халқ артисти Комилжон Отаниёзов таваллудининг 100 йиллик байрами қатнашчиларига Атоқли санъаткор хотирасига эҳтиром Пойтахтимизнинг «жанубий дарвозаси» янада қулай, шинам ва кўркам бўлади Академия профессионал кадрлар тайёрлаш маскани бўлмоғи лозим Дори-дармон таъминотида сунъий тақчиллик юзага келмайди Сув келтирган элда азиз Ўзаро манфаатли ҳамкорликни янги даражага олиб чиқиш йўлида Академик Борис Бондаренко Изланиш ва янгича ишлаш самараси аҳоли бандлигини таъминлашда ўз ифодасини топмоқда Жиноятга жазо муқаррар, аммо... Ривожланиш истиқболлари муҳокамаси Ҳамюртимиздан ўтадигани топилмади Нодир асарлар хазинаси «Ягонасан, муқаддас Ватан!» Сиёсий партиялар: Амалий ишлар билан халқ ишончини қозониш мумкин Солиққа оид ўзгаришлар тадбиркорлар манфаатларига хизмат қилади Ишбилармон хотин-қизлар ташаббуси қўллаб-қувватланмоқда Хорижий инвестор: яратиб берилаётган имкониятлардан мамнунмиз Осуда ва хотиржам ҳаёт «Бир болага етти маҳалла ҳам ота, ҳам она» «Нексия» музейдан жой олди Мурожаатлар адолатли ечим топмоқда Асосий мақсад — одил судловни таъминлаш Ҳавзалар баракаси 40 минг тоннага кўпаяди «Муҳаббат оламининг булбули» Юракдан куйланган қўшиқлар «Замонамиз қаҳрамонлари» Солиқ маъмуриятчилигини тубдан такомиллаштириш, солиқлар ва бошқа мажбурий тўловларнинг йиғилувчанлигини ошириш чора-тадбирлари тўғрисида «Маҳалла ифтихори» — ҳам рағбат, ҳам шараф Депутат «юқори»дан топшириқ кутмаслиги керак
  • 16 Май 2017

Ўзбекистон маданий мероси — жаҳон ҳамжамияти эътиборида

Улуғ аждодларимиз ақлу заковати улар тайёрлаган буюмлар, ҳунармандчилик, бунёдкорлик, каштадўзлик, китобат санъатида ҳам яққол намоён бўлган. Халқимизнинг бундай бой тарихий-маданий мероси асрлар давомида авлоддан-авлодга ўтиб келаётганлиги эса барчамизда чексиз ғурур уйғотади. Бинобарин, ушбу анъана ҳозирги пайтда ҳам алоҳида эъзозланмоқда.

Бу ҳақда кеча пойтахтимизда иш бошлаган “Ўзбекистон маданий мероси — халқлар ва давлатлар ўртасидаги мулоқотга йўл” мавзуидаги халқаро илмий-маданий конгресснинг очилиш маросимида ҳам алоҳида таъкидланди. 

Мазкур тадбир Ўзбекистоннинг маданий меросини янада кенгроқ тарғиб этиш ва асраб-авайлаш мақсадида Ўзбекистон электрон оммавий ахборот воситалари миллий ассоциацияси томонидан “Тараққиёт стратегияси” маркази, Фанлар академияси, Бадиий академия, ЮНЕСКО ва Германиянинг Конрад Аденауэр номидаги жамғармасининг мамлакатимиздаги ваколатхоналари ва бошқа қатор ташкилотлар ҳамкорлигида уюштирилди.

Таъкидлаш жоизки, мазкур конгресс Президентимиз Шавкат Мирзиёев ташаббуси билан ишлаб чиқилган 2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган вазифалар ижросига -қаратилгани билан ҳам ўзига хос аҳамиятга эга. Зеро, ана шу ҳужжатда халқимизнинг бой ўтмиши, маданий меросини чуқур ўрганиш ва асраб-авайлаш, мамлакатимизда истиқомат қилаётган турли миллат ҳамда элатлар, диний конфессиялар ўртасидаги ўзаро ҳамжиҳатликни, юртимизнинг жаҳон ҳамжамиятидаги ўрни ва мавқеини мустаҳкамлашга алоҳида эътибор қаратилган. 

Шарқшунослик, археология, тарих, нумизматика, тўқимачилик, кулоллик соҳаларига ихтисослашган 120 дан ортиқ хорижий ва 100 дан зиёд маҳаллий экспертлар орасида Россия, Канада, Италия, Буюк Британия, Ҳиндистон, Миср, Жанубий Корея, Бельгия, Голландия, Франция, Германия, Чехия, АҚШ, Хитой, Туркия, Греция, Озарбайжон ва бошқа мамлакатлардан келган илм-фан вакиллари — машҳур олимлар, музейлар ва илмий-тадқиқот институтлари раҳбарлари бор.

Икки кунга мўлжалланган илмий анжуманнинг илк кунида республикамиз ҳудуди ҳамда жаҳоннинг турли давлатлари музейларида сақланаётган моддий ва бадиий маданиятнинг нодир объектларига бағишланган маърузалар тингланди. 

Тадбирда “Дунё тўпламларида Ўзбекистоннинг маданий мероси” эксклюзив маданий-маърифий медиа-лойиҳаси тақдимоти ўтказилди. Бунда “Ўзбекистоннинг маданий мероси” туркумида уч тилда нашр этилган китоб-альбомларнинг дастлабки беш жилди — “Шарқ давлат музейи тўплами” (Москва), “Россия этнография музейи тўплами” (Санкт-Петербург), “Третьяков давлат галереяси тўплами” (Москва), “Ўзбекистон гиламлари ва кашталари дунё тўпламларида” (Россия, АҚШ, Канада, Австралия), шунингдек, “Алишер Навоий асарлари Россия миллий кутубхонаси тўпламларида” (Санкт-Петербург) каби -китоблар намойиш этилди.

Бундан ташқари, нашрга тайёрланаётган 6 та жилд — “Ўзбекистоннинг мусиқий мероси”, “Давлат Эрмитажи тўплами”, “Давлат тарих музейи тўплами”, “Шарқ қўлёзмалари институти тўплами”, “Ўзбекистон гиламдўзлиги: асрлар оша сақланган анъаналар” ва “Германия музейлари тўпламлари” хусусида ҳам фикр алмашилди. Ушбу китобларни нашрга тайёрлашда таниқли олимлар, санъатшунослар, мусиқашунос ва шарқшуносларнинг хизмати беқиёс. 

Шунингдек, халқаро анжуманда чет эллик профессорлар, тарих, санъатшунослик фанлари докторлари, санъат соҳасидаги етакчи экспертлар Ўзбекистоннинг тарихий-маданий меросига бағишланган маърузалари билан қатнашади. 

— Дунё тажрибасидан яхши маълумки, — дейди халқаро анжуман иштирокчиси, Чехиянинг Классик археология институти халқаро экспедицияси раҳбари Ладислав Станчо, — сайёҳлик кўпгина давлатлар учун нафақат муҳим даромад манбаи, балки иқтисодиётни юксалтирувчи куч ҳисобланади. Мамлакатингиз бу борада катта имкониятларга эга. Халқингизнинг бой тариxий ва маданий мероси сайёҳларни ўзига кўпроқ жалб этиши табиий. Шу маънода, ушбу конгресснинг аҳамияти бениҳоя катта. Чунки бунда биз юртингиздаги энг машҳур обидалар билан танишиб, таассуротларимизни бойитамиз, ўз юртимизга бориб, кўрган-кечирганларимиз ҳақида юртдошларимизга ҳикоя қилиб берамиз.  

Анжуман иштирокчилари бугун кўҳна ва ҳамиша навқирон Самарқанд шаҳрига ташриф буюришади. Улар учун Регистон майдонида ноёб мусиқий ҳавола — “Ўзбекистон маданий мероси — бутун инсоният бойлиги” 3D мэпинги томошаси, Мирзо Улуғбек мадрасасида ўзбек гиламдўзлари ва каштачилари кўргазмаси ҳамда “Ўзбекистон гиламлари ва сўзаналари дунё тўпламларида” альбоми тақдим этилади. Қолаверса, “Боғишамол” мажмуида “Ўзбекистоннинг мусиқий мероси” китоб-альбоми тақдимоти ҳам ўтказилади. 

Мақсуд ЖОНИХОНОВ,

«Халқ сўзи» мухбири.

 

Кўриш қобилияти чекланганлар учун

A- A A+