Францияда ўзбек рассомининг кўргазмаси
  • 14 Апрель 2017

Францияда ўзбек рассомининг кўргазмаси

Рюэй-Мальмезон шаҳрида ўзбек миниатюрачи рассоми Давлат Тошев асарларининг кўргазмаси бўлиб ўтди. Тадбир мамлакатимизнинг Франциядаги элчихонаси томонидан мазкур шаҳар мэрияси ва Бухоро шаҳар ҳокимияти билан ҳамкорликда давлатларимиз ўртасида дипломатик муносабатлар ўрнатилганининг 25 йиллиги муносабати билан ташкил этилди.

Кўргазманинг очилиш маросимида Рюэй-Мальмезон шаҳри маъмурияти, маҳаллий органлар депутатлари, Франциянинг ишбилармон, маданий ва ижтимоий доиралари, ОАВ вакиллари ҳамда Бухоро шаҳри делегацияси қатнашди.

Тадбир чоғида мамлакатимизда амалга оширилган демократик, ижтимоий-иқтисодий ислоҳотлар, сармоявий ва иқтисодий муҳитни такомиллаштириш, маданий меросни оммалаштириш борасидаги ишлар Ўзбекистон ва Франция ўртасидаги алоқаларнинг янада самарали ривожланишига мустаҳкам асос яратиши таъкидланди.

Маълумки, Бухоро ва Рюэй-Мальмезон шаҳарлари ўртасидаги ҳамкорлик алоқалари 1999 йилнинг январь ойида ўрнатилган ҳамда ҳозирги кунгача фаол ривожланиб келмоқда. Хусусан, йўлга қўйилган мунтазам делегациялар алмашинуви, ўтказиб келинаётган маданий тадбирлар, амалга оширилаётган қўшма лойиҳалар халқларимиз ўртасидаги дўстона муносабатларни мустаҳкамлашга хизмат қилмоқда.

Францияликлар Марказий Осиёнинг юрагида жойлашган ва ўзининг бой тарихи, маданияти ҳамда Ўрта асрлар Шарқ меъморчилигининг дурдоналари билан машҳур Ўзбекистонга катта қизиқиш билан қарашади. Ўтган йиллар давомида Рюэй-Мальмезон шаҳрининг юзлаб аҳолиси мамлакатимизда бўлиб, Бухоронинг диққатга сазовор масканлари ва меҳмондўст халқи билан танишиш имкониятига эга бўлишди.

“XXI аср ўзбек миниатюра санъати” мавзуидаги мазкур кўргазма Франция жамоатчилигининг Ўзбекистонга бўлган қизиқишини яна бир бор намойиш этди ва уларни мамлакатимизга таклиф қилишнинг ўзига хос кўриниши бўлди.

Тадбирда “Жаҳон” ахборот агентлиги мухбири айрим иштирокчиларнинг таассурот ҳамда мулоҳазалари билан қизиқди.

 

Филипп ТРОТАН, Рюэй-Мальмезон шаҳри мэрининг халқаро муносабатлар, шериклик алоқалари ва сайёҳлик масалалари бўйича -ўринбосари:

— Рюэй-Мальмезон шаҳри мэрияси Давлат Тошевнинг кўргазмаси ўтказилишидан ва Бухоро шаҳри делегациясини кутиб олишдан жуда мамнун. Ушбу тадбир иккала шаҳар ҳамда халқларимиз ўртасидаги мустаҳкам дўстона алоқаларнинг рамзини ифодалайди. Биз кўргазма ва ўзбекистонлик меҳмонларнинг ташрифи самимий муносабатларимизни янада яқинлаштиради, деб ҳисоблаймиз.

Миниатюрачи рассом Д. Тошевнинг фавқулодда истеъдод эгаси эканини алоҳида таъкидлашни истардим. Кўргазманинг ташкил этилиши Рюэй-Мальмезон шаҳри ҳамда Парижнинг Иль-де-Франс минтақаси аҳолиси учун ўзбек миниатюра мактаби вакилининг бебаҳо суратлари, мамлакатингизнинг бой маданияти ва сайёҳлик салоҳияти билан яқиндан танишиш имконини яратди.

 

Жан-Клод РИШАР, Франциянинг Ўзбекистондаги собиқ элчиси:

— Бугун бетакрор Бухоро шаҳри вакиллари билан учрашиш менга улкан мамнуният бағишлади. Рюэй-Мальмезондаги Д. Тошев мўйқаламига мансуб кўргазма Ўзбекистоннинг ноёб миниатюра санъати намунасидир.

Бундан 18 йил муқаддам иккала шаҳар ўртасида шериклик алоқаларини ўрнатиш масалаларининг бошида туриш менга насиб этганидан жуда хурсандман. Бу жараёнда шаҳримизнинг ўша пайтдаги мэри Жак Баумелнинг хизматлари катта бўлган. Бухоро ва Рюэй-Мальмезон Ўзбекистон ҳамда Франциянинг биродарлашув алоқалари ўрнатилган илк шаҳарлари бўлди. Ушбу муносабатлар янада фаолроқ ривожланишини ва Франциянинг бошқа шаҳарлари учун намуна бўлиб хизмат қилишини истардим.

Мазкур ажойиб кўргазма икки мамлакат муносабатларида фойдали ҳамда ўзаро манфаатли аҳамият касб этади. Давлатларимиз ўртасидаги ҳамкорлик дўст икки халқ фаровонлиги йўлида янада муваффақиятли ривожланишини дилдан хоҳлаймиз.

«Жаҳон» АА.

Париж

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn