Шанхайда Алишер Навоийга ҳайкал ўрнатилди
  • 15 Март 2017

Шанхайда Алишер Навоийга ҳайкал ўрнатилди

Хитойнинг йирик шаҳарларидан бирида, Шанхай университетининг марказий майдонида буюк ўзбек шоири ва мутафаккири Алишер Навоий ҳайкали ўрнатилди.

Унинг очилишига бағишланган маросимда Тошкент шаҳар ҳокимлиги ҳамда Ўзбекистон Бадиий академияси вакилларидан иборат мамлакатимиз делегацияси, Хитойнинг Шанхай ва бошқа университетлари раҳбарияти, ўқитувчи-профессорлари, Хорижий давлатлар билан дўстлик уюшмаси, етакчи таҳлилий марказлар ходимлари, жамоатчилик вакиллари, талабалар ҳамда журналистлар қатнашди.

Бронзадан ишланган 3 метрлик улуғвор ёдгорликка гранитдан ясалган махсус супа ва унинг атрофида йўлаклар барпо этилгани йиғилганлар таҳсинига сазовор бўлди. Таъкидлаш жоизки, кўп миллионли аҳоли истиқомат қиладиган мазкур улкан шаҳарда дунёнинг кўплаб буюк шахсларига ёдгорлик бюст кўринишида ўрнатилган, Алишер Навоийга эса бор бўй-бастини намоён этган улкан ҳайкал қад ростлади.

Тадбирда сўзга чиққан Шанхай университети партия қўмитаси котиби Ло Хунцзе ўзбек халқининг Шарқ мамлакатлари ҳамда бутун дунё маданий меросига қўшган ҳиссасининг ёрқин ифодаси бўлган Алишер Навоий шахсига олий ўқув юрти ҳудудида ҳайкал ўрнатилишидан беҳад мамнунлигини изҳор қилди.

— Бу хитойликларнинг ўзбек халқига, унинг адабиёти ва санъатига улкан ҳурматининг намунасидир. Буюк Ипак йўлининг чорраҳасида жойлашган Ўзбекистон замини дунёга замонавий цивилизациянинг шаклланишига ўзининг улкан ҳиссасини қўшган кўплаб даҳо шахсларни берган, — деди Л. Хунцзе. — Ўзбек халқининг буюк фарзанди бўлмиш Алишер Навоий дунё адабиётида ўчмас из қолдирди. Давлат бошқарувида нуфузли лавозимни эгаллаб тураркан, у илм-фанни қўллаб-қувватлади, ўсиб келаётган авлоднинг таълим олишига хизмат қилди, унинг мислсиз гўзал назмий асарлари эса Шарқ шеърияти тарихида янги даврни бошлаб берди. Навоий достонларида кўтарилган ғоялар ҳамда қарашлар орадан асрлар ўтган бўлишига қарамай, ўз долзарблигини ҳамон йўқотмаган.

— Биз ўзбек адабиёти даҳо вакилининг ҳайкали шаҳримиз марказида жойлашган университетимиз майдонида виқор билан туриши ва унга ҳар куни 40 мингдан зиёд талаба ҳамда ўқитувчиларнинг назари тушишидан фахрланамиз, — деди Шанхай университети ҳузуридаги Ўзбекистон билан тадқиқот ва таълим алмашинуви маркази директори Яо Симин. — Келгусида ҳар йили 9 февраль куни ана шу ёдгорлик олдида Алишер Навоий таваллуди куни нишонланади.

Хорижий давлатлар билан дўстлик уюшмаси вице-президенти Жин Ингнинг фикрига кўра, Алишер Навоий ўзбек мумтоз адабиёти тарихида муҳим ўрин эгаллайди.

— Навоий ижоди ўз даври шеъриятини сифат жиҳатидан янги даражага кўтарди. Бугунги кунда ҳам унинг бадиий мероси мутахассислар томонидан катта эътибор билан ўрганилмоқда. Хусусан, Хитойда Алишер Навоий шахсига қизиқиш ортиб бораяпти, Шанхай шаҳрида атоқли мутафаккирга ўрнатилган ҳайкал бунинг яққол тасдиғидир.

«Жаҳон» АА.

Шанхай

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn