Ўзбек ёзувчисининг китоби Лондонда чоп этилди
  • 09 Январь 2017

Ўзбек ёзувчисининг китоби Лондонда чоп этилди

Ўзбекистон Республикаси халқ ёзувчиси Эркин Аъзамнинг “Буюк осий Шайх Санъон ворислари” (Heirs to the Great Sinner Sheikh San’on) китоби Буюк Британияда инглиз тилида нашр этилди ва Евроосиё ижодий гильдияси муассислигидаги “Open Eurasian Literature Festival & Book Forum” V Халқаро адабиёт фестивали доирасида унинг тақдимоти ўтказилди. Таъкидлаш жоизки, бу замонавий ўзбек ёзувчилари китобининг Лондонда илк бор чоп этилишидир.

2014 йили ҳам Эркин Аъзам қаламига мансуб “Эртак билан хайрлашув” тўплами Ўзбекистоннинг ЮНЕСКОдаги доимий ваколатхонаси шафелигида инглиз ва француз тилларида нашр этилиб, Вашингтон ҳамда Парижда қўш тақдимот бўлиб ўтган эди. “Hertfordshire Press” нашриёт уйи ана шу тўпламни янги таржималар билан бойитиб, “Буюк осий Шайх Санъон ворислари” номи билан ўқувчилар эътиборига ҳавола этди.

— Адабий фаолиятим мобайнида МДҲ мамлакатлари адабиётига мансуб кўплаб китобларга муҳаррирлик қилганман. Шу ҳисобда Эркин Аъзамнинг китоби — эллигинчи ишим, — дейди тўпламга сўзбоши ёзган Кэрол Ермакова. — Гарчи, китобда шу номдаги асар бўлмаса-да, унинг бутун мундарижаси ўша машҳур Шайх Санъоннинг эътиқодий фалсафасига уйғунлигини илғаш мумкин. Адиб асарларини мутолаа қилиб, бугунги Марказий Осиёнинг юрак уришини эшитгандек бўламиз.

Тўпламга адибнинг беш асари — “Шовқин” романи, “Гули-гули”, “Пакананинг ошиқ кўнгли” қиссалари, “Ёзувчининг боғи” ҳамда “Мусофирнинг қизини ит қопди” ҳикоялари киритилган. Ўзбек насрининг сара намуналари саналган мазкур асарларда тарихнинг бурилиш даврида яшаган инсонлар қисмати, замондошлар руҳиятида кечаётган ўзгаришлар жамики зиддиятлари, ижобий ва салбий жиҳатлари билан қаламга олинган. Миллий романчиликда жиддий воқеа ўлароқ баҳоланган “Шовқин” романи ўтган асрнинг 90-йилларида кечган қалтис воқеликлар ҳақида. Таъкидлаш жоизки, бу — ўзбек адабиётида ўша давр ижтимоий-сиёсий эврилишлари йирик планда тадқиқ этилган илк асардир. Романда ўзбек зиёлиларининг ўша мураккаб даврдаги кечмиши ёрқин тасвирланган. 

Тўпламга киритилган бошқа  асарлар ҳам рамз, истиора ва тагмаъноларга бойлиги билан китобхонга унутилмас таассуротлар улашади. 

Эркин Аъзам — инсонпарварлик ва ҳурлик ғоялари тараннум этилган асарлари билан ўзбек адабиёти ривожига муносиб ҳисса қўшиб, китобхонлар муҳаббатини қозонган адиб. Унинг ижоди ўарб ўқувчиларига ҳам манзур бўлса ажаб эмас.

 

«Жаҳон» АА.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn