«Евроньюс» телеканали юртимиз тарихий обидалари ҳақида 
  • 06 Январь 2017

«Евроньюс» телеканали юртимиз тарихий обидалари ҳақида 

“Евроньюс” телеканали мамлакатимизнинг бой тарихий ва маданий меросига бағишланган туркум лавҳаларнинг навбатдагисини эфирга узатишни бошлади.

Хорижлик ижодкорлар бу гал Бухородаги Пои Калон ёдгорлик мажмуаси ҳақида маълумотларни тақдим этишмоқда. Телеканал мухбири Шеймус Керни мажмуа таркибига кирувчи Минораи Калон (Катта минора) ноёб меъморий иншоотлардан бири эканини -алоҳида таъкидлаб, баландлиги қарийб 47 метрга тенглигини, шу боис ундан шаҳарнинг деярли барча жойи худди кафтдагидек кўриниб туришини билдиради.

“Мазкур минора Марказий Осиёдаги энг қадимий обидалардан саналади” дея урғу беради лавҳа муаллифи. Томошабинлар ҳукмига ҳавола қилинаётган телемаҳсулотда Пои Калон мажмуасига кирувчи ёдгорликлар ҳақида атрофлича сўз юритилаяпти.

Албатта, халқаро миқёсда катта аудиторияни қамраб олган нуфузли телеканалда юртимизга оид лавҳаларнинг мунтазам бериб борилаётгани қалбимизда чексиз ғурур ва ифтихор ҳиссини уйғотади. Бу эзгу саъй-ҳаракатлар, ўз навбатида, хорижликларнинг Ўзбекистонга бўлган қизиқишини янада ошириш ҳамда сайёҳлар оқимини кўпайтиришда алоҳида аҳамиятга эгадир.

Маълумот ўрнида айтиб ўтамиз, “Евроньюс” телеканалини 155 давлатда 350 миллиондан ортиқ томошабин кузатиб боради.

Шавкат ОРТИҚОВ 

тайёрлади.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn