Бандликда ижобий кўрсаткич
  • 21 Апрель 2015

Бандликда ижобий кўрсаткич

Жорий йилнинг дастлабки уч ойида Буюк Британияда 248 минг киши ишга жойлашди. Шу тариқа мамлакатда меҳнат билан банд бўлган аҳоли сони 31 миллион кишига етди. Ишсизлик даражаси 5,6 фоизга тушди. Бу 2008 йилдан бери қайд этилган энг яхши кўрсаткичдир.

Ўз навбатида, февраль ойи якуни бўйича ойлик маошлар миқдори турли мукофотлар қўшилмаган ҳолатда ўртача 1,8 фоиз ошган. 

Автомобиль бозори тикланмоқда
Европа автомобиль бозори жаҳон молиявий-иқтисодий инқирозидан кейинги тикланиш жараёнига ўтди, дейилади “Евроньюс” телеканали хабарида.
Маълумотларга кўра, шу йилнинг март ойида Европа Иттифоқига аъзо давлатларда янги машиналар савдоси 10,8, биринчи чорак якунлари бўйича эса 8,5 фоиз ўсган.
Бундай ижобий натижа автомобилсозлар учун йирик бозор саналадиган нафақат Германия, Буюк Британия ва Францияда, балки узоқ вақт давомида глобал иқтисодий таназзул таъсирида бўлган Греция ҳамда Португалияда ҳам кузатилган.

Даромади камайди
Шу йилнинг дастлабки чорагида “Eurostar” темир йўл компаниясининг даромади 2014 йилнинг шу давридагига нисбатан 6 фоиз камайди.
Аввало, маълумот сифатида айтиш жоизки, мазкур компания поездлари Ла-Манш бўғози орқали ўтиб, Буюк Британия, Франция ҳамда Бельгия ҳудуди бўйлаб ҳаракатланади. Маблағ тушумининг камайиб кетишига эса бир қанча омиллар сабаб бўлган. Шулардан бири айнан Ла-Маншдаги туннелда рўй берган ёнғин билан боғлиқ. Чунки ушбу ҳодиса туфайли қатнов вақтинча тўхтатиб қўйилган эди.
“Eurostar” мутасаддиларининг таъкидлашича, даромад ҳажмининг пасайгани шунчаки тасодиф. Ушбу даврда бизнес-классдан фойдаланувчилар сони 7 фоиз ўсгани эса алоҳида эътиборга молик.

Вулқон яна фаоллашди
Мексикадаги “Колима” вулқонидан ажралиб чиқаётган кул ва тутун уч ярим километр баландликкача етаяпти.
Бу ҳолат мамлакат ғарбидаги Халиско штатининг айрим ҳудудларида мураккаб вазиятни юзага келтирган. Маҳаллий маъмурият аҳолига кўчага иложи борича камроқ чиқишни тавсия қилди. Шунда ҳам махсус ниқоблар, респираторлар ва қуёшдан ҳимояловчи кўзойнаклардан фойдаланиш уқтирилган.
Мамлакат пойтахтидан 480 километр ғарбда, денгиз сатҳидан тўрт километр баландликда жойлашган “Колима” вулқони 500 йилдан ошиқроқ вақтдан бери ҳаракатда. Ушбу давр мобайнида у 40 мартадан кўпроқ отилиб чиққан.

Билим олиш ёш танламайди
АҚШнинг Висконсин штатида яшовчи 103 ёшли Мари Хантнинг энг катта орзуси ушалди. У ўрта маълумот олганлик тўғрисидаги гувоҳномага эга бўлди.
Энди Мари хоним таҳсилни коллежда давом эттирмоқчи. Бундай кечикишнинг сабаби бор, албатта. 90 йил муқаддам ука ва сингилларини тарбиялаш унинг зиммасига тушган эди. Шу боис Мари хоним ўрта таълимни тугаллай олмаган.
— Мактабни битиришни жуда хоҳлагандим, — дейди у маҳаллий нашрлардан бирига берган интервьюсида. — Мана мақсадимга етишдим. Ҳозир ўзимни соғлом ва тетик ҳис қилаяпман. Яна билим олишни истайман.

Хориж матбуоти хабарлари асосида тайёрланди.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn