Капиталини кўпайтиради
  • 08 Ноябрь 2014

Капиталини кўпайтиради

Италиянинг “Monte dei Paschi di Siena” банки директорлар кенгаши молия муассасаси капиталини 2,5 миллиард еврога кўпайтириш тўғрисидаги қарорни маъқуллади, дейилади “Евроньюс” телеканали хабарида.

Гап шундаки, нуфузи жиҳатидан мамлакатда учинчи ўринда турувчи ушбу банк яқинда Европа марказий банкининг стресс-тестидан ўта олмаган эди. Шу боис унга капиталидаги тақчилликни бартараф этиш учун тўққиз ой муҳлат берилган.
“Monte dei Paschi di Siena” давлат томонидан кўрсатилаётган кўмакка қарамай, мана, уч йилдирки, катта миқдордаги зарар билан ишлаяпти.

Йил якуни бўйича тахмин
Япониянинг “Toyota” автоконцерни жорий молиявий йил якуни бўйича кутилаётган даромад ҳажмига оид прогноз кўрсаткичларини оширди. Унга кўра, компания 2,5 триллион иена — 17,5 миллиард евро миқдоридаги маблағга эга бўлади.
“Toyota” учун АҚШ энг муҳим бозор ҳисобланади. Жаҳонда нефть ва бензин нархи пасайгани туфайли ана шу давлатда машиналарга талаб сезиларли даражада ортди ва бу автоконцернга қулай имконият туғдирди. Ўз навбатида, Япония ишлаб чиқарувчиси йил якунига қадар Хитойда ҳам маҳсулотлари савдоси ҳажми 20 фоиз ўсишига умид қилмоқда.

Сабаби ўрганилмоқда
Аргентинанинг Кордова шаҳридаги лок-бўёқ заводида кучли портлаш рўй берди.
Маҳаллий оммавий ахборот воситалари хабарига қараганда, воқеа оқибатида 12 киши жароҳатланган. Улардан айримларининг аҳволи оғир. Корхонага яқин ҳудудда жойлашган уйлар, дўконлар ва автомобилларга ҳам жиддий зарар етган. Портлаш сабаби ўрганилмоқда.

Мўмай даромадга эга футболчилар
АҚШнинг “Forbes” журнали дунёнинг энг кўп даромад оладиган футболчилари рўйхатини эълон қилди.
Унда Испаниянинг “Реал” клуби жамоаси ҳужумчиси Криштиану Роналдо биринчи ўринда қайд этилган. Ушбу футболчи йилига 80 миллион АҚШ доллари миқдорида маблағ ишлаб топади. Иккинчи ва учинчи ўринларни Лионель Месси (“Барселона”, 64,7 миллион доллар) ҳамда Златан Ибрагимович (“ПСЖ”, 40,4 миллион доллар) эгаллаган.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn