Европа ва Осиё ўртасидаги энг қисқа йўл
  • 31 Октябрь 2017

Европа ва Осиё ўртасидаги энг қисқа йўл

Боку — Тбилиси — Қарс темир йўли орқали Туркия жанубидаги Мерсин портига Қозоғистонда етиштирилган ғалла ортилган илк темирйўл состави жўнатилди.

Бу ҳақда “Anadolu” агентлиги хабар тарқатди.

Алати портида бўлиб ўтган  мазкур йўлнинг очилиш маросимида Туркия президенти Ражаб Тоййиб Эрдўғон, Озарбайжон президенти Илҳом Алиев, Ўзбекистон бош вазири Абдулла Арипов, Қозоғистон бош вазири Бақтжон Сағинтаев ва Грузия бош вазири Георгий Квирикашвили иштирок этди.

Янги темир йўл Туркия, Озарбайжон ва Грузия, шунингдек, тарихий “Буюк ипак йўли”да жойлашган бошқа давлатлар ўртасидаги ҳамкорликни мустаҳкамлашга хизмат қилади.

Боку — Тбилиси — Қарс темир йўлининг умумий узунлиги 838 километр. Унинг 76 километри Туркия, 259 километри Грузия ва 503 километри Озарбайжон ҳудудидан ўтади.

Туркия ҳудудида тўртта станция, учта кўприк ва 76 километр темирйўл қурилган. Лойиҳа доирасида Туркия ва Грузия чегарасида улкан туннель барпо этилган. Бир қисми (2375 м) Туркия ҳудудидан ўтса, яна бир қисми (2070 м) Грузия майдонида жойлашган.

Ушбу лойиҳа туфайли Грузияда янги 105 километрлик темирйўл магистрали қурилди, 154 километрлик участка реконструкция қилинди. Озарбойжон ҳудудида эса 503 километр темир йўл қайта таъмирланган.

Янги темир йўл Лондон ва Пекин ўртасида узлуксиз қатновни амалга ошириш имконини беради. Осиё ва Европа ўртасидаги юкларнинг транспортировкаси Туркия бюджетига ҳам даромад келтиради.

Боку — Тбилиси — Қарс темир йўли эксплуатациясидан транспорт артерияси бўйлаб жойлашган барча давлатлар, жумладан Туркманистон, Қозоғистон, Ўзбекистон, Покистон, Афғонистон ва Ҳиндистон фойда олади.

Янги транспорт йўлаги орқали йилига 17 миллион тоннагача юк ташиш мумкин.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn
Мазкур рукндаги бошқа мақолалар: « Фаолиятини тугатди 31 йилда илк бор »