«Ўзбекистон Буюк Ипак йўлининг юрагидир»
  • 05 Август 2017

«Ўзбекистон Буюк Ипак йўлининг юрагидир»

Япониянинг Сендай ва Нагоя шаҳарларида Ўзбекистоннинг сайёҳлик салоҳияти, маданияти ҳамда санъатига бағишланган тақдимот маросими бўлиб ўтди.

Мамлакатимизнинг Япониядаги элчихонаси ва ушбу мамлакатнинг “World Air-Sea Service” ҳамда “Hankyu International Travel” компаниялари билан ҳамкорликда ўтказилган мазкур тадбирда парламент, ҳукумат, маданият ва ишбилармон доиралар ҳамда оммавий ахборот воситалари вакиллари иштирок этди.

Тадбир давомида қатнашчилар эътиборига Ўзбекистонда сайёҳлик соҳасини ривожлантириш, бу борадаги инфратузилмани модернизациялаш, хизмат кўрсатиш сифатини яхшилаш ва республикага келадиган меҳмонлар дам олишлари учун қулай шароитлар яратиш бўйича амалга оширилаётган чора-тадбирлар ҳақида батафсил маълумот берилди. Шунингдек, маросим давомида концерт дастури ҳам бўлиб ўтди. Унда ўзбек классик мусиқасининг энг яхши намуналари ижро этилди.

“World Air-Sea Service” бош менежери Юко Такешита “Жаҳон” ахборот агентлигига берган интервьюси чоғида Ўзбекистонни Марказий Осиёдаги йирик мамлакат ва улкан маданий бойликлар хазинаси, дея эътироф этди.

— Бу ўлка Буюк Ипак йўлининг юраги бўлиб, асрлар давомида илғор илм-фан ютуқлари ва кашфиётлари билан донг таратган заминдир, — деди Ю. Такешита. — Мамлакатларимиз ўртасида мустаҳкам дўстона муносабатлар ва ўзаро манфаатли ҳамкорлик ўрнатилгани қувонарли ҳолдир. Тадбир давомида Ўзбекистон ҳақида тақдим этилган маълумотлар япониялик сайёҳ ва сармоядорларнинг юртингизга бўлган қизиқиши янада ортишига хизмат қилади. Жорий йилда Япониянинг турли йирик шаҳарларидан Самарқанд шаҳрига чартер авиақатновлари йўлга қўйилгани ҳам айнан ушбу мақсадларга йўналтирилгандир.

«Жаҳон» АА.

Токио

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn