«Ўзбекистон: кашф этилган янгиликлар»
  • 27 Июль 2017

«Ўзбекистон: кашф этилган янгиликлар»

Хорижий телеканал томонидан шу номли ҳужжатли фильм суратга олинмоқда.

Юртимизда яшаб ўтган алломаларнинг бой маънавий мероси, халқимиз азалий урф-одат ва анъаналари ҳамиша жаҳон аҳлининг ҳайратига сабаб бўлиб келган. Бобокалонларимизнинг тиббиёт, астрономия, фиқҳ, тарбия борасидаги бой билим ва ноёб истеъдоди, ҳарб санъатидаги маҳорати бугун ҳам кенг тадқиқ этилиб, жиддий ўрганилмоқда.
Шу маънода, Россиянинг “Культура” телеканали томонидан “Ўзбекистон: кашф этилган янгиликлар” номли бир соатлик ҳужжатли фильм суратга олинаётганлиги қувонарлидир.
У Ўзбекистон электрон оммавий ахборот воситалари миллий ассоциацияси ҳамда “Караван-ТВ” ҳамкорлигида тасвирга туширилаяпти. Фильмда Ўзбекистоннинг азалий урф-одат ва анъаналари билан ҳамоҳанг равишда жадал ривожланаётгани ҳақида ҳикоя қилинади. Бугун ўтмиш ҳамда замонавийликнинг ўзаро уйғунлигини ҳар қадамда кузатиш мумкин. Хусусан, Тошкентда муқаддас ислом динининг асл қадриятларини янада тўла англашга хизмат қиладиган Ислом маданияти маркази ташкил этилмоқда. Самарқандда ислом олами олим ва мутафаккирларининг меросини ўрганадиган Халқаро илмий-тадқиқот маркази очилади. Бухородаги 1536 йилда барпо этилган қадимий “Мир Араб” мадрасасида илму толиблар учун замонавий талабларга жавоб берадиган шароитлар яратилмоқда.
Фильм продюсери Фирдавс Абдухолиқовнинг таъкидлашича, бу Ўзбекистон электрон оммавий ахборот воситалари миллий ассоциациясининг Россия телекомпаниялари билан навбатдаги қўшма лойиҳасидир. У Ватанимиз мустақиллигининг 26 йиллигига муносиб туҳфа бўлади.
Тошкент, Самарқанд, Бухоро, Хива, Термиз ва бошқа шаҳарларда суратга олинаётган фильмда ноёб кино ҳамда фотоҳужжатлар, архив кадрлари, шахсий архив материалларидан фойдаланилади. Шунингдек, машҳур меъморлар, олимлар, тарихчи ва хаттотлар, мамлакатимизнинг турли ҳудудларида истиқомат қиладиган оддий одамлар билан суҳбатлар уюштирилиши ҳам кўзда тутилган.


Мақсуд ЖОНИХОНОВ.


Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn