Барқарор ўсиш кузатилади
  • 27 Июль 2017

Барқарор ўсиш кузатилади

Халқаро валюта жамғармаси жаҳон иқтисодиёти барқарор ўсишда давом этишини билдирди. Ташкилот прогнозига кўра, дунё ялпи ички маҳсулоти жорий йилда 3,5, келгуси йили эса 3,6 фоиз ошиши кутилмоқда.

Таъкидланишича, АҚШнинг жаҳон иқтисодиёти юксалишидаги ўрни келгусида бир оз пасаяди, аммо мамлакат мазкур соҳада олдин кутилганидан кўра зиёдроқ ўсишга эришади. Хусусан, АҚШ ялпи ички маҳсулоти жорий йил 2,5 фоиз ортади. Шунингдек, Буюк Британиянинг бу борадаги кўрсаткичи ҳам олдинги тахминлардан кўра анча юқори бўлиши белгиланган.
Мутахассислар 2017 йили ўзаро маҳсулот айирбошлаш ва хизматлар кўрсатиш соҳаси ҳам ўтган йилдагига нисбатан 4 фоиз ортиши мумкинлигини тахмин қилишмоқда.

Электромобиллар эрасига янги қадам
“Toyota” (Япония) компанияси электромобиллар учун янги турдаги батареяларни яратиш устида иш олиб бораяпти. Мазкур ихтиро амалга ошгач, машинани атиги бир неча дақиқа мобайнида қувватлантириш имконияти пайдо бўлади.
Айни пайтда тадқиқотлар якунига етиб қолган. Хабар берилишича, бундай батареялар билан жиҳозланган электрокарлар 2022 йилдан эътиборан сотувга чиқарилади. “Яқин йилларда биз бошқа компаниялар томонидан ҳам ушбу жабҳада рақобатга киришилишини кузатишимиз табиий. “BMW” ва “Mercedes-Benz”нинг янада кучли электродвигатель ишлаб чиқиш борасидаги саъй-ҳаракатлари буни яққол тасдиқлайди”, дея фикр билдиради европалик таҳлилчи Крейг Эрлам.
Экспертларнинг айтишича, келгуси ўн-ўн беш йил ичида дунё автомобиль бозорининг асосий қисми электромобиллардан иборат бўлади.

Францияда ҳам ўрмон ёнғинлари
Франциянинг Жануби-Шарқида жойлашган ҳудудлар — Юқори Корсика, Воклюз, Альп денгизбўйи ҳамда Вар департаментларида кучли шамол туфайли ўрмон ёнғинлари тобора авж олаяпти.
Душанба кунидан буён уч минг гектардан ортиқ майдон кулга айланган. Юздан зиёд аҳоли вакиллари эвакуация қилинди. “Тилсиз ёв”ни бартараф этиш учун йигирмага яқин самолёт ва вертолётлар, икки минг нафардан кўпроқ ўт ўчирувчилар жалб қилинган. Айни пайтгача уларнинг 4 нафари енгил, бир нафари эса оғир даражадаги куйиш билан шифохоналарга ётқизилган. Яна 15 нафар ўт ўчирувчи ис гази билан заҳарлангани айтилмоқда.
Ёнғин нима сабабдан юз бергани ҳозирча номаълум.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn