Грецияда Ўзбекистон тақдимоти
  • 10 Июль 2017

Грецияда Ўзбекистон тақдимоти

Афина кичик ва ўрта бизнес палатасида Ўзбекистоннинг сармоявий ҳамда сайёҳлик салоҳиятига бағишланган тақдимот маросими бўлиб ўтди. Кичик ва ўрта бизнес жабҳасида фаолият кўрсатаётган Греция компанияларининг вакиллари ушбу тақдимотнинг иштирокчилари бўлдилар.

Учрашувда мамлакатимизда амалга оширилаётган кўламдор ўзгаришлар, сармоя жалб этиш ва бизнес юритиш учун -яратилаётган қулайликлар ҳақида батафсил маълумот берилди. Таъкидланганидек, Ўзбекистонда кўпгина йўналишлар бўйича салмоқли салоҳият, жумладан, бой минерал-хом ашё, малакали кадрларнинг мавжудлиги ҳамда ўлкамизнинг жуғрофий жиҳатдан қулай жойлашгани мамлакатимизнинг изчил ривожланишига ва хорижлик шериклар билан фаол ҳамкорлик қилишига кўмаклашмоқда.   

Афина кичик ва ўрта бизнес палатасининг раиси Павлос Раванис бундай ахборот тадбирлари Греция бизнес-ҳамжамиятининг вакиллари ўртасида катта қизиқиш уйғотишини қайд этар экан, ўз мамлакатида фаолият кўрсатаётган кичик ва ўрта бизнес вакиллари ўзбекистонлик шериклар билан иқтисодий ҳамда сайёҳлик соҳасида амалий алоқаларни ўрнатишдан манфаатдорлигини таъкидлади.

Афина Савдо-саноат палатаси вице-президенти Патроколос Кудунис Ўзбекистон эришган сўнгги иқтисодий кўрсаткичларни юқори баҳолади ва палата икки мамлакат тадбиркорлик субъектлари ўртасида шериклик алоқалари ўрнатилишига кўмак беришга тайёр эканлигини маълум қилди. Унинг айтишича, сут маҳсулотлари, қурилиш материаллари, тўқимачилик ишлаб чиқариши ҳамда қайта тикланадиган энергия манбалари, озиқ-овқат маҳсулотларини ишлаб чиқариш ва чорвачилик соҳаларидаги лойиҳаларни амалга оширишда қатнашиш савдо-иқтисодий ҳамкорликдаги энг истиқболли йўналишлар ҳисобланади. 

Грециянинг “КНИТЕКС” компанияси бош директори Ф. Вликидис ўз чиқишида тўқимачилик маҳсулотларини ишлаб чиқариш бўйича Марказий Осиё минтақасида етакчи мамлакат бўлмиш Ўзбекистон бу соҳада ҳали тўлиқ ишга солинмаган улкан салоҳиятга эга эканлигини таъкидлади. 

— Ўзбекистонда тўқимачилик саноатини ривожлантиришнинг натижалари юқори баҳога лойиқдир, — деди у. — Мустақиллик йиллари давомида ушбу жабҳага 2,5 миллиард АҚШ доллари миқдоридаги сармоя жалб қилингани ҳолда, 300 дан зиёд йирик сармоявий лойиҳалар ҳаётга татбиқ этилди.  Бу тўқимачилик соҳасини ривожлантириш юзасидан Ўзбекистон Республикаси ҳукумати танлаган йўлнинг жуда тўғри эканлигини тасдиқлайди. 

«Жаҳон» АА.

Афина

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn