Гиёҳвандлик моддалари оқимига тўсиқ
  • 15 Июнь 2017

Гиёҳвандлик моддалари оқимига тўсиқ

Брюсселда “Наркотиклардан холи Европа учун жамғарма” нодавлат ташкилоти томонидан ўтказилаётган наркотик моддалар билан боғлиқ жиноятларга қарши курашиш ва уларнинг олдини олиш бўйича тўртинчи Европа учрашуви доирасида мамлакатимизнинг мазкур йўналишдаги саъй-ҳаракатларига бағишланган брифинг бўлиб ўтди.

Тадбирда Ўзбекистон ўзининг гиёҳвандлик моддаларининг ноқонуний айланишига қарши курашиш бўйича халқаро мажбуриятларига катта аҳамият қаратаётгани алоҳида таъкидланди. Шунингдек, Афғонистонда гиёҳвандлик моддаларини тайёрлаш ҳамда уларнинг “Шимолий йўлдан” келаётган оқими миқдори камаймаётгани, бу эса минтақавий хавфсизликка салбий таъсир кўрсатаётгани айтиб ўтилди.

Брифингда Ўзбекистон ҳуқуқни муҳофаза қилиш идоралари томонидан трансмиллий наркогуруҳларни аниқлаш ва уларнинг фаолиятига чек қўйиш, контрабанда йўлларини ёпиш, гиёҳвандлик воситаларини йўқ қилиш ҳамда бу иллатнинг олдини олиш бўйича амалга оширилаётган махсус мажмуавий чора-тадбирлар ҳақида батафсил маълумот берилди.

Иштирокчилар мамлакатимизда 2016 — 2020 йилларда гиёҳвандлик моддаларини истеъмол қилиш ва уларнинг ноқонуний айланишига қарши курашишнинг комплекс чора-тадбирлари дастури доирасида амалга оширилаётган профилактика ишлари билан яқиндан таништирилди. Айни пайтда соғлиқни сақлаш, таълим тизими ҳамда соғлом турмуш тарзини тарғиб этувчи оммавий ахборот воситалари фаолиятини кучайтириш, аҳолида гиёҳвандлик моддаларига нисбатан салбий муносабатни шакллантириш, белгиланган маъмурий ва жиноий жавобгарлик хусусида тушунтириш беришга катта эътибор қаратилаётгани таъкидланди.

“Наркотиклардан холи Европа учун жамғарма” нодавлат ташкилоти 2004 йили Стокгольмда (Швеция) ташкил қилинган. У Европа Иттифоқи мамлакатларида гиёҳвандлик моддалари истеъмолининг олдини олиш масалалари бўйича ахборот-тарғибот ишларини фаол олиб боришга йўналтирилган.

«Жаҳон» АА.

Брюссель

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn