Ўсиш кузатилди
  • 07 Май 2017

Ўсиш кузатилди

Жорий йилнинг биринчи чорагида евроҳудудга кирувчи давлатлар иқтисодиётида ўсиш кузатилди.

“Евростат” маълумотига кўра, ушбу даврда 19 мамлакат ялпи ички маҳсулоти 2016 йилнинг сўнгги уч ойидагига нисбатан ўртача 0,5 фоиз ошган. Европа Иттифоқига аъзо 28 давлатда эса бу борадаги кўрсаткич 0,4 фоизни ташкил қилди. 

Статистика ташкилоти эришилган натижаларнинг омилларига тўхталиб ўтмаган. Экспертларнинг фикрича, “кўҳна қитъа” иқтисодиётидаги ижобий ҳолат ички истеъмол талабининг ортгани ва бизнесга инвестициялар йўналтирилгани билан боғлиқ.

 

Банкротлик арафасида

Италиянинг “Alitalia” авиакомпанияси раҳбарияти банкротлик жараёнини бошлади.

Компанияни инқироздан олиб чиқиш бўйича тузилган режани ходимларининг қарийб 70 фоизи қўллаб-қувватламаганидан сўнг мутасаддилар ана шундай йўл тутишга мажбур бўлишди. Жамоа аъзолари қайта ташкил этиш ишларига хоҳиш билдирмаганининг боиси бор, албатта. Режага кўра, иш ўринлари ва ойлик маош-

лар миқдори қисқартирилиши лозим эди. Қолаверса, икки миллиард евро ҳажмида инвес-тиция киритилиши ҳам кўзда тутилганди. Энди эса банкротликдан бошқа чора йўқлиги таъкидланмоқда.

 

Иш ўринларини кўпайтирмоқчи

АҚШнинг “Apple” корпорацияси раҳбари Тим Кук мамлакатда иш ўринлари сонини кўпайтиришга ҳисса қўшиш мақсадида жамғарма ташкил этиб, дастлаб унга 1 миллиард доллар миқдорида маблағ йўналтиришини билдирди.

Бу ҳақда “Си-Эн-Би-Си” телеканали хабар тарқатди. Янги меҳнат жойлари технологиялар ишлаб чиқариш соҳасида очилади. Тадбиркорнинг таъкидлашича, бу бошқа тармоқлар ривожига ҳам туртки беради. “Apple” вакиллари лойиҳани ҳаётга татбиқ этиш бўйича аллақачон ишга киришишган. Масалан, жамғармадан маблағ оладиган компаниялар билан маслаҳатлашувлар ўтказилган. 

“Apple” корпорацияси 1976 йилда тузилган бўлиб, “iPhone” смартфонлари, “MacBook” ноутбуклари, “iMac” компьютерлари, шунингдек, бошқа кўплаб техника воситаларини ишлаб чиқаради.

 

Европадан Осиёга

Хитой футбол клублари миллий чемпионатни кучайтириш мақсадида жаҳонга машҳур ўйинчиларни ўз сафига қўшиб олиш бўйича саъй-ҳаракатларини давом эттирмоқда.

Ана шундай келишувлардан бири, шубҳасиз, айрим манбаларнинг хабар беришича, Англиянинг “Челси” жамоаси ва “Тяньцзинь Цюаньцзянь” клуби ўртасида амалга оширилди. Унга кўра, ҳужумчи Диего Коста жорий мавсум якунида Хитойга йўл олади. Унинг трансфер нархи 90 миллион еврога баҳоланган. Костанинг янги жамоасидаги йиллик маоши 30 миллион евро этиб белгиланган. Олди-сотди шартномаси шу ой ўрталарида расмийлаш-тирилиши айтилмоқда. Бироқ Хитой клуби бу маълумотни тасдиқлагани йўқ.

Хориж матбуоти хабарлари асосида тайёрланди.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn