Қуввати икки баробар ортди
  • 06 Апрель 2016

Қуввати икки баробар ортди

Косонсой туманидаги “Булоқбоши” насос станциясида амалга оширилган модернизациялаш тадбирларидан сўнг унинг қуввати икки баробар ортиб, беш минг гектар майдондаги экинларни сув билан таъминлаш имконияти юзага келди.

— Бундан қирқ йил аввал барпо этилган мазкур гидростанция маънавий эскириб, иш унумдорлиги жуда пасайиб кетганди, — дейди пудрат ишларини олиб борган “Наманган газ, сув қурилиш” масъулияти чекланган жамияти раҳбари Ойбек Рафиқов. — Лойиҳа доирасида хориждан келтирилган саккизта агрегат, шунингдек, замонавий электр двигателлари ҳамда бошқа жиҳозлар ўрнатилди. Улар айни пайтда сониясига 13,2 кубометр обиҳаётни 48 метр баландликка етказиб бермоқда.

Ушбу лойиҳа Осиё тараққиёт банки томонидан ажратилган 11,9 миллион АҚШ долларилик сармоя эвазига амалга оширилди. Модернизациялаш  жараёнида насосга  сув етказиб берувчи каналнинг 16,9 километрлик қисми ҳам мукаммал таъмирдан чиқарилди.

Қудратилла НАЖМИДДИНОВ,  «Халқ сўзи» мухбири.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn