XS.UZ
Маҳаллий экспорт қилувчи ташкилотларни янада қўллаб-қувватлаш ва ташқи иқтисодий фаолиятни такомиллаштириш чора-тадбирлари тўғрисида Кўп томонлама ҳамкорлик истиқболлари Истиқлол саодати ва шукрона Кичик бизнес салоҳияти рақобатдош маҳсулотлар ишлаб чиқаришда яққол намоён бўлмоқда ЎзХДП қатъий позициясини белгилаб олди Тадбиркорларни қўллаб-қувватлаш қамрови янада кенгаяди Ўзбекистонлик ишбилармонлар Швейцарияда Оқибати аянчли иллат Хусусий сектор ривожига сармоялар Молиявий саводхонлик нима? Яхши ниятлар, эзгу амаллар Фарҳодбек — жаҳон чемпиони Спортда мухлисларни қувонтирадиган натижалар бўлади Олдини олган афзал Ипак саноатининг довруғи қачон тикланади? Ўзбекистон Республикаси Вазирлар Маҳкамаси ҳузуридаги Ўзбекистон Республикасининг фан ва техника, адабиёт, санъат ва меъморчилик соҳасидаги Давлат Рамазон ҳайитини нишонлаш тўғрисида Ўзбекистон Республикаси аҳолисига 2017 — 2021 йилларда ихтисослаштирилган тиббий ёрдам кўрсатишни янада ривожлантириш чора-тадбирлари тўғрисида Инсон манфаатларини таъминлаш — асосий мақсад Ўзбекистон Республикаси Вазирлар Маҳкамаси ҳузуридаги Ўзбекистонга оид хориждаги маданий бойликларни тадқиқ этиш марказини ташкил этиш тўғрисида Тадбиркорлар ҳуқуқларини ҳимоя қилишда муҳим босқич Сиёсий мулоқотларнинг амалий натижалари Суд тизими янгиланишлари соҳадаги хато ва камчиликларни бартараф этишга хизмат қилади Юқори малакали кадрлар Бизнеснинг қонуний манфаатлари давлат томонидан муҳофаза қилиниши ва тадбиркорлик фаолиятини янада ривожлантириш тизимини тубдан такомиллаштиришга доир Мурожаатлар ислоҳотларнинг жойлардаги натижаларини кўрсатади Оилавий тадбиркорлик нега оқсамоқда? Тинч-осуда ҳаётимизни асрашнинг муҳим мезони Маҳаллийлаштириш ва инвестициявий муҳит самараси Сенаторлар Ҳаракатлар стратегияси ижросида фаол иштирок этмоқда
  • 17 Октябрь 2015

Ўзбекистон — жаҳон пахта бозорида юксак салоҳиятга эга

Пойтахтимизда Президентимиз ташаббуси билан ташкил этилган ХI Халқаро Ўзбекистон пахта ва тўқимачилик ярмаркаси ўз ишини якунлади. Икки кун давом этган мазкур нуфузли тадбир доирасида 700 минг тонна ўзбек пахта толаси ҳамда умумий қиймати 800 миллион АҚШ долларидан ортиқ тўқимачилик маҳсулотлари савдоси бўйича шартномалар имзоланди.

Бу, кутилганидек, жаҳон пахта бозорининг Тошкент форуми юртимиз ишлаб чиқарувчилари ва хорижий харидорлар ўртасида савдо-иқтисодий алоқаларни янада мустаҳкамлашга хизмат қилганининг ёрқин далилидир.
 Чиндан ҳам, бу йилги Халқаро Ўзбекистон пахта ва тўқимачилик ярмаркаси ўзбек пахта толаси ҳамда қўшимча қийматга эга тўқимачилик маҳсулотларининг экспорти бўйича янги савдо йўлакларини очиш, тенг манфаатли ҳамкорлик алоқаларини ўрнатишда қулай бизнес муҳитини юзага келтиргани билан кўпчиликнинг ёдида қолади. Нега деганда, унинг ишида жаҳоннинг 40 та давлатидан 1000 дан ортиқ компания ва фирмалар вакиллари иштирок этиб, маҳсулотларимизни воситачиларсиз тўғридан-тўғри сотиб олишга муваффақ бўлдилар. Шунинг ўзиёқ ўзбек пахта толаси, табиий матолари, бежирим кийим-кечаклари жаҳон бозорида бемалол рақобатга кириша олаётгани, уларга бўлган талаб эса йил сайин ортиб бораётганидан далолат эмасми?! 
Чет эллик экспертларнинг эътироф этишича, Ўзбекистон пахтачилик тармоғи ва тўқимачилик саноатида рўй бераётган сифат ўзгаришларини биргина мисол, яъни экспорт жуғрофияси кенгайиб бораётганида ҳам кўриш мумкин. Негаки, илгари толамиз, асосан, Европа давлатлари томонидан сотиб олинган бўлса, эндиликда уни Хитой, Бангладеш ҳамда Жануби-Шарқий Осиёнинг бошқа мамлакатлари ҳам импорт қилмоқда. Бунинг сабаби битта: у ҳам бўлса, ўзбек пахта толаси юқори сифат кўрсаткичлари билан чет эллик харидорларнинг ишончини оқлади. Ушбу ютуқ замирида тизимда олиб борилаётган оқилона ислоҳотлар, тўғри экспорт сиёсати юритилаётганининг самараси мужассам, десак, айни ҳақиқатдир.  
— Ўзбекистон ва Сингапур ўртасидаги савдо-иқтисодий алоқалар ҳамма йўналиш, хусусан, пахтани бирламчи қайта ишлаш ва енгил саноат тизимида жадал ривожланмоқда, — дейди “Texcoms Worldwide” компанияси вакили Гопалкришнан Рагу. — Чунки жаҳон пахта бозорининг марказига айланган юртингизда барча харидорга тенг имконият яратиб берилган. Тақдим этилаётган тола сифатига эса гап йўқ. Шунинг учун бу йилги форум жуда самарали ўтди.
Қисқа давр ичида халқаро пахта бозорининг муҳим иштирокчиларига айланган “Ўзмарказимпекс”, “Ўзинтеримпекс” ва “Ўзсаноатмашимпекс” давлат ташқи савдо компаниялари замонавий савдо усулларини қўллаш орқали маркетинг стратегиясини амалга ошираётгани ҳамкорларга ҳар томонлама манзур бўлаётир. Мисол учун, доимий стратегик ҳамкорларга эга ушбу ташқи савдо компанияларида ўзбек толасини бутун пахта мавсуми давомида бир маромда етказиб бериш имконияти мавжуд.
ХI Халқаро Ўзбекистон пахта ва тўқимачилик ярмаркаси иштирокчилари форум давомида бунга яна бир карра ишонч ҳосил қилдилар. Сабаби, улар тадбирнинг иккинчи кунида бевосита жойларда бўлиб, пахта хом ашёсини бирламчи қайта ишлаш, толани сифатли сақлаш, харидорларга белгиланган муддатларда етказиб бериш хизмати, калава ип, тўқимачилик маҳсулотлари ва тайёр кийим-кечаклар тайёрлаш жараёни билан яқиндан танишдилар.
Чет эллик соҳа мутахассислари дастлаб пойтахт вилоятининг Юқори Чирчиқ туманидаги “Ўзбекистон пахта тозалаш заводи” акциядорлик жамиятида бўлдилар. У “Ўзпахтасаноат” уюшмаси тизимида фаолият кўрсатаётган 98 та корхона ичидаги етакчи ишлаб чиқариш субъектларидан бири ҳисобланади. Кейинги йилларда бу ерда рўёбга чиқарилган кенг кўламли модернизациялаш лойиҳалари, айниқса, меҳмонларда катта таассурот қолдирди. 
— Пахта йиғим-терими якунланаётган ҳозирги пайтда шартномалар асосида вилоятимиз фермер хўжаликларидан қабул қилиб олинган 20 минг тонна қимматбаҳо хом ашёни қайта ишлаяпмиз, — дейди мазкур корхона бош муҳандиси Тўлқин Қулманов. — Ушбу жараёнда модернизация лойиҳалари доирасида цехларга ўрнатилган энг сўнгги русумдаги линиялар асқатаяпти. Хусусан, Хитойдан келтирилган тозалаш, пресслаш ускуналари иш унумдорлигини ошириш,  тола сифатини яхшилаш имкониятини яратиб, унинг довруғини дунёга ёйишга хизмат қилаётир.
Бу каби юқори сифатли хом ашёни ўзимизда чуқур қайта ишлаш ҳажмини муттасил ошириб бориш соҳада ҳаётга татбиқ этилаётган ислоҳотларнинг устувор йўналишларидан биридир. Шу маънода, “Uztex Chirchik” тўқимачилик фабрикаси хом ашёни чуқур қайта ишлаш йўлга қўйилган илғор ишлаб чиқариш субъектларидан бири бўлиб, ташқи бозорга, асосан, тайёр маҳсулотлар етказиб бермоқда. Корхона фаолияти билан яқиндан танишган чет эллик мутахассислар юртимизда тўқимачилик саноатини тараққий эттиришга қаратилган ислоҳотлар беқиёс натижа бераётганига амин бўлганликларини таъкидладилар.
— Мазкур замонавий корхона мисолида Ўзбекистон иқтисодиётининг жадал ривожланаётганига яна бир карра ишонч ҳосил қилдим, — дейди Ҳиндистоннинг “Danodar Menon International” компанияси раҳбари Абдул Калом Озод. — Бу ерда толани чуқур қайта ишлаш ва тизимли равишда маҳсулот тайёрлаш йўлга қўйилгани таҳсинга лойиқ. Ярмарка доирасидаги шуъба йиғилишларида айтилганидек, бу юртингизда ҳар йили амалга ошириладиган юзлаб йирик лойиҳалардан бири эканлигини инобатга оладиган бўлсак, яқин келажакда Ўзбекистонда тўқимачилик саноати экспорти янада ошиши аниқ. Корхонада меҳнат қилаётган 200 нафар кишининг аксарияти ёшлар эканлиги, улар ўз ишини моҳирлик билан бажараётгани ҳам эътиборимни тортди. Демак, мамлакатингизда соҳа учун етук кадрлар тайёрлаш масаласи ўз ечимини топган.
“Uztex Chirchik” корхонасида тайёрланаётган калава ип, бўялган мато, шунингдек, тайёр кийим-кечаклар сифати юқорилиги туфайли ташқи бозорда тобора харидоргир бўлиб бораяпти. Маҳсулотларнинг асосий қисми дунёнинг 55 давлатига экспорт қилинаётгани бунинг яққол далилидир.
Таъкидлаш керакки, ўзбек пахта толаси экспорти ҳажмининг ошишида логистика хизмати алоҳида аҳамиятга эга. Ўзбекистон Республикаси Президентининг 2006 йил 29 августдаги “Пахта толасини сотиш ва унинг учун ҳисоб-китоб қилиш механизмини тартибга солиш тўғрисида”ги қарори ижроси, айтиш мумкинки, шундай хизматлар кўрсатишга ихтисослаштирилган йигирмадан зиёд пахта терминаллари фаолиятини янада кенгайтириш имконини берди. Бундан ташқари, юртимизда 410 минг тонна пахта толасини бир вақтда сақлаш имкониятига эга тўртта бўш омбор борлиги диққатга сазовордир. 
Ярмарка иштирокчилари “Тошкент-Тола” ихтисослаштирилган минтақавий пахта терминалига ташриф буюриб, унинг мисолида юртимиздаги ана шундай субъектлар фаолияти билан танишишга муяссар бўлдилар.
Маълумот ўрнида айтиш жоизки, “Тошкент-Тола” пахта терминали омборларида бир пайтнинг ўзида 45 минг тонна ҳажмдаги пахта толасини сақлаш имконияти мавжуд. Умумий омборларнинг бир қисми эркин омбор тизимига ўтказилгани харидорлар учун янада қулайлик яратади. Боиси, харидор сотиб олган хом ашё, унинг хоҳишига кўра, токи олиб кетилгунгача шу омборларда сақланиши таъминланади.
— Бу ерда чет эллик ҳамкорлар учун яратилган шарт-шароитлар менга жуда маъқул тушди, — дейди “SL Trade International” компанияси раҳбари, бангладешлик Саид Айнур Раҳмон. — Чунки шу ернинг ўзида пахта толасига оид барча маълумотни олиш мумкин. Ўзбекистон “Сифат” марказининг лабораторияси, божхона, давлат карантин назорати пункти каби хизматларнинг терминал ҳудудида йўлга қўйилгани ишларни қисқа фурсатда амалга оширишда қўл келади.
Жаҳон пахта бозорининг бу йилги Тошкент форумига ташриф буюрган дунё тўқимачилик саноатининг етакчи компаниялари вакиллари, трейдер ва экспертлар эътиборига мамлакатимиз ҳудудларининг инвестициявий салоҳияти, тўқимачилик тармоғини ривожлантиришга доир янги лойиҳалар ҳам ҳавола этилди. Президентимизнинг 2015 йил 4 мартдаги “2015 — 2019 йиллар учун ишлаб чиқаришнинг тузилмавий қайта тузилиши, замонавийлашиши ва диверсификациясини таъминлаш бўйича чора-тадбирлар дастури тўғрисида”ги Фармони билан тасдиқланган дастур, айниқса, хорижлик инвесторларда катта қизиқиш уйғотди. Негаки, унинг доирасида беш йил мобайнида умумий қиймати 918 миллион долларлик 77 та лойиҳа рўёбга чиқарилиши кўзда тутилган. Шунинг учун ҳам, меҳмонлар ушбу тўқимачилик лойиҳаларига инвестиция киритишдан манфаатдор эканликларини зўр мамнуният билан изҳор қилдилар.  
Хорижлик инвесторлар ўз бизнесини мамлакатимиз билан боғлашга интилаётгани бежиз эмас. Чунки Ўзбекистон жаҳонда пахтачилик ва тўқимачилик тармоқлари жадал ривожланаётган давлатлардан бири бўлиб, бу ерда етиштирилган юқори сифатли пахта толаси ташқи ва ички бозорда рақобатдош бўлган маҳсулотлар ишлаб чиқаришда қўл келади. Анъанавий Халқаро Ўзбекистон пахта ва тўқимачилик ярмаркаси эса юртимиз ишлаб чиқарувчилари ҳамда хорижлик инвесторлар ўртасида савдо-сармоявий ҳамкорликни янада мустаҳкамлашда нурли уфқларни очиб бермоқда. 

Саид РАҲМОНОВ,
«Халқ сўзи» мухбири.

Кўриш қобилияти чекланганлар учун

A- A A+

Кўп ўқилган