Имконият, ташаббус ва тараққиёт
  • 25 Апрель 2015

Имконият, ташаббус ва тараққиёт

Ўзбекистон Республикаси Президенти соврини учун тадбиркорлар, фермерлар ва ҳунармандлар ўртасида ўтказилаётган “Ташаббус — 2015” кўрик-танловининг Тошкент шаҳар босқичи бўлиб ўтди.

Таъкидлаш жоизки, мамлакатимизда истиқлол йилларида қулай ишбилармонлик муҳити яратилиб, тадбиркорлик, фермерлик ва ҳунармандчиликка кўплаб имтиёзлар берилгани туфайли мазкур соҳалар ҳам жадал ривожланиб, иқтисодиётимизнинг ҳал қилувчи кучига айланаётир. Айниқса, турли кўрик-танловлар ўтказилиб, юртимиз тараққиёти йўлида фидокорона меҳнат қилаётган ишбилармонлар муносиб рағбатлантирилаётгани уларни янги марралар сари руҳлантириб, ташаббус кўрсатишга ундаяпти. 1996 йилдан буён анъанавий тарзда ўтказиб келинаётган “Ташаббус” кўрик-танлови бунга яққол мисол бўла олади.
Дарҳақиқат, мазкур танлов юртдошларимизнинг тадбиркорлик салоҳиятини юзага чиқариш, мулкдорларнинг кичик ва ўрта синфини тараққий эттириш, уларнинг илғор тажрибаларини оммалаштириш, энг муҳими, соҳалараро кооперация алоқаларини мустаҳкамлашга хизмат қилмоқда.
Натижада кичик бизнес субъектларининг ички бозорни сифатли маҳсулотлар билан тўлдириш, экспорт ҳажмини ошириш, аҳоли бандлиги ва турмуш фаровонлигини таъминлашдаги улуши йил сайин ортиб бораяпти. Улар томонидан таклиф этилаётган маҳсулотлар эса ўзининг сифат кўрсаткичлари билан бемалол рақобатга кириша олади. “Ташаббус — 2015” республика кўрик-танловининг Тошкент шаҳар босқичи иштирокчилари маҳсулотлари кўргазмасига ташриф буюрганлар шундай хулосага келиши, шубҳасиз. Негаки, бу ерда туман босқичларининг 650 нафар иштирокчиси орасидан ғолибликни қўлга киритган 22 нафар энг илғор тадбиркор ва ҳунарманд ўз маҳсулотларини тақдим этаётир. Импорт ўрнини босувчи спорт жиҳозлари, машинасозлик, қурилиш материаллари, қувурлар, лок-бўёқ, енгил саноат, мебелсозлик, чарм-пойабзал маҳсулотлари ҳар қандай диди нозик харидорнинг ҳам эътиборини тортмай қолмайди. Шу боис кўргазма майдони Тошкент шаҳри аҳолиси ва меҳмонлари билан гавжум.
Ҳунармандлар фаолиятида ҳам бу каби янгиликлар бисёр. Мисол учун, ҳайкалтарош Камолиддин Абдуллаевнинг ландшафт дизайни учун яратган турли жониворлар ҳайкаллари, каштадўз Шодиёна Турдиалиеванинг миллийлик ва замонавийлик уйғунлашган буюмлари, ёғоч ўймакори Рустам Исмоиловнинг заргарлик ҳамда наққошликдек нозик санъат турларини уйғунлаштирган ҳолда ишлаган асарлари, Мираббос Саъдуллаевнинг теридан ишланган гилам ва совғабоп маҳсулотлари барчага манзур бўлди.
Ташкилотчиларнинг айтишича, бу йилги танлов иштирокчиларини баҳолашда нафақат ишлаб чиқариш кўрсаткичи, балки фаолиятига татбиқ этган янгиликлари, яратган қўшимча иш ўринлари, импорт ўрнини босувчи ва экспортбоп маҳсулотлар тайёрлашни ўзлаштиргани каби жиҳатлар инобатга олинди. Якунда Шайхонтоҳур туманидаги “Azia Sport-S” хусусий фирмаси раҳбари Саидаҳмад Камолов “Энг яхши тадбиркор”, Чилонзор туманидаги якка тартибдаги тадбиркор Равшан Норхўжаев эса “Энг яхши ҳунарманд” йўналишларида ғолиб деб топилиб, кўрик-танловнинг республика босқичида иштирок этиш ҳуқуқини қўлга киритди.

Саид РАҲМОНОВ,
«Халқ сўзи» мухбири.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn