Маҳсулотнинг 90 фоизи экспортга
  • 24 Март 2015

Маҳсулотнинг 90 фоизи экспортга

Боғотдаги Бешариқ қишлоғида калава ип ишлаб чиқаришга ихтисослаштирилган “Xorazm tex” масъулияти чекланган жамияти ишга туширилиши туман аҳолиси учун чинакам байрам туҳфаси бўлди.

Айтиш керакки, мазкур лойиҳа таъсисчиларига собиқ тўқимачилик фабрикасининг бино ва иншоотлари таъмири учун 10,5 миллиард сўмлик инвестиция киритиш ҳамда 200 та иш ўрни яратиш шарти қўйилган эди. Бу ерда 12,5 миллиард сўмлик қурилиш-монтаж ишлари бажарилди ва энг замонавий технологик дастгоҳлар келтириб ўрнатилди. Натижада унинг биринчи босқичи ишга туширилиб, йилига 4300 тонна экспортбоп калава ип тайёрлаш имконияти пайдо бўлди. Ҳозир бу ерда 200 киши меҳнат қилмоқда. Уларнинг аксарияти коллеж битирувчилари ҳисобланади.
Лойиҳанинг иккинчи босқичида хориждан 30 миллиард сўмлик замонавий технологиялар келтириш кўзда тутилмоқда. У амалга ошиши билан яна 200 та иш ўрни яратилади. Эътиборлиси, бу ерда тайёрланадиган маҳсулотнинг 90 фоизи ташқи бозорга йўналтирилади.      

Ойбек РАҲИМОВ,
«Халқ сўзи» мухбири.

 

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn