Мулоқотнинг самарали механизми истеъмолчилар манфаати таъминланаётганида яққол намоён бўлмоқда
  • 18 Октябрь 2017

Мулоқотнинг самарали механизми истеъмолчилар манфаати таъминланаётганида яққол намоён бўлмоқда

Жорий йилнинг 9 ойи давомида Ўзбекистон истеъмолчилари ҳуқуқларини ҳимоя қилиш жамиятлари Федерацияси ва унинг ҳудудий тузилмаларига 8 минг 173 та мурожаат келиб тушган бўлиб, уларнинг 89 фоизи ижобий ҳал этилди. Натижада истеъмолчилар фойдасига етказилган 2 миллиард 984,6 миллион сўмлик зарар ундирилди.

Бу ҳақда пойтахтимизда “Халқ билан мулоқотнинг самарали механизмларини жорий этишда жамоат ташкилотларининг ўрни” мавзуида ўтказилган матбуот анжуманида маълумот берилди.

Таъкидланганидек, Ҳаракатлар стратегиясини Халқ билан мулоқот ва инсон манфаатлари йилида амалга оширишга оид Давлат дастури ижроси доирасида Федерация томонидан истеъмолчиларнинг қонуний манфаатларини ҳимоя қилиш, ҳуқуқларини тиклаш бўйича кенг кўламли ишлар олиб борилмоқда.

Мисол учун, ҳозирги пайтгача жойларда 7670 марта ана шундай тадбир ўтказилди. Уларда уй-жой, коммунал соҳа, савдо, соғлиқни сақлаш, алоқа, транспорт ҳамда сервис хизматлари, шунингдек, таълим ва бошқа жабҳаларга дахлдор масалалар атрофлича ўрганилиб, аксарияти ўз ечимини топгани эътиборга моликдир.

Соҳага оид қонунларни кенг тарғиб этишда “Истеъмолчи билан мулоқот” ҳуқуқий маслаҳатхоналари ташкил қилингани ҳам ўз самарасини бермоқда. Бундан ташқари, Федерациянинг “Ишонч телефони”, расмий веб-сайти ишлаб тургани, Виртуал қабулхонаси очилгани фуқаролар мурожаатлари билан ишлаш имкониятларини кенгайтирмоқда.

Анжуманда тизимда қўлга киритилган ана шундай ютуқлар билан бирга, айрим камчиликлар ҳам учраётгани қайд этилди. Ўз навбатида, фаолият самарадорлигини ошириш билан боғлиқ таклиф ва тавсиялар ишлаб чиқилди.

Илҳом РАҲМАТОВ,
«Халқ сўзи» мухбири.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn