Замонавий ускуналар, инновацион технологиялар тўқимачилик ва енгил саноат ривожида янги уфқларни очмоқда
  • 14 Сентябрь 2017

Замонавий ускуналар, инновацион технологиялар тўқимачилик ва енгил саноат ривожида янги уфқларни очмоқда

Кеча пойтахтимиздаги “Ўзэкспомарказ” мажмуасида “Тўқимачилик ускуналари ва технологиялари — CAITME — 2017” ҳамда “Тўқимачилик саноати — TextileExpo Uzbekistan — 2017” халқаро кўргазмалари очилди.

Иқтисодиётимиз ривожи, экспорт салоҳияти ошиши, аҳоли бандлиги таъминланиши каби муҳим вазифалар ижросида тўқимачилик ва енгил саноатнинг ўрни ниҳоятда катта. Шу боис мамлакатимизда мазкур соҳа равнақига жиддий эътибор қаратилиб, хориж инвестицияларини жалб этган ҳолда, янги қувватларни ишга тушириш, мавжудларини модернизациялаш бўйича йирик лойиҳалар ҳаётга татбиқ қилинаяпти. Президентимизнинг 2016 йил 21 декабрдаги “2017 — 2019 йилларда тўқимачилик ва тикув-трикотаж саноатини янада ривожлантириш чора-тадбирлари дастури тўғрисида”ги қарори ушбу йўналишдаги саъй-ҳаракатларни сифат жиҳатидан янги босқичга олиб чиқишга катта туртки бўлди. Сабаби, мазкур ҳужжатга мувофиқ, умумий қиймати 2,2 миллиард АҚШ долларилик 132 та инвестициявий лойиҳа амалга оширилаяпти.

Уларнинг тенг ярми чет эл сармоялари ва кредитлари эвазига молиялаштирилаяптики, бу эса хорижликларнинг саноатнинг ушбу жабҳаларига бўлган қизиқиши юқорилигидан далолат беради.

Шу билан бирга, қиймати 450 миллион долларлик 50 та қўшимча лойиҳа ишлаб чиқилди. Уларнинг изчил ижроси тармоқда экспорт ҳажмини йилига 2,5 миллиард долларгача кўпайтириш, қўшимча равишда 25 мингта иш ўрни яратиш имконини бериши кутилаётгани қувонарлидир. 

Халқаро кўргазмаларнинг очилиш маросимида таъкидланганидек, чиндан ҳам, кейинги пайтда тўқимачилик ва енгил саноатнинг инвестициявий жозибадорлиги ортиб бормоқда. Бу, ўз навбатида, хорижлик сармоядорларнинг бизнес фаолиятини юртимиз билан боғлаш, ҳамкорликда замонавий ишлаб чиқариш корхоналарини ишга туширишга руҳлантирмоқда. Буни кўргазма қатнашчилари сони ўтган йилдагига нисбатан 35 фоиз ўсгани мисолида ҳам кўриш мумкин.

Дарҳақиқат, жорий йилги саноат форумларининг бирлашган экспозициясида дунёнинг 22 мамлакатидан 353 та компания энг сўнгги ва сара маҳсулотлари билан иштирок этаяпти. Кўргазмага ташриф буюрган киши пахта толасини чуқур қайта ишлаб, уни тайёр кийим-кечак ҳолига келтиргунга қадар қандай машина ва дастгоҳга эҳтиёж сезса, уларнинг ҳаммасини топади.

Бу эса тадбирларнинг ўта қизғин кечиши, томонлар ўртасида кўплаб шартномалар имзоланишида муҳим омил бўлаяпти. Бундай дейишимизнинг боиси биринчи кундаёқ аксарият ускуналарда “Сотилган” ёрлиқлари пайдо бўла бошлади.

— Ўзбекистонда тўқимачилик ва енгил саноат корхоналарига энг замонавий ускуналарни татбиқ қилишга устувор аҳамият берилаяпти, — дейди Япониянинг “Tajima Industries Ltd.” компанияси раҳбари Хидеки Тажима. — Биз ушбу кўргазмаларда 11 йилдан буён мунтазам иштирок этиб, мустаҳкам ҳамкорликни йўлга қўйган тадбиркорлар фаолияти мисолида бунга кўп бора гувоҳ бўлганмиз. Шу боис бу гал  юртингиз ишбилармонлари талаблари асосида иккита янги нақш тўқиш ускунасини тақдим қилаяпмиз. Улар кичик ва ўрта бизнес вакиллари учун мўлжалланган бўлиб, тезлиги ўта юқори, электрон бошқарув тизимига эга. Муҳими, роботлаштирилган бу ускуналар энг нафис гул ва нақшларни ҳам юқори сифатли қилиб тўқийди. Шу боис уларга қизиқиш катта.

Соҳа мутахассисларининг айтишича, саноатнинг тикувчилик ва тўқимачилик жабҳаларида муваффақият қозониш учун -ишлаб чиқаришга янги ишланмаларни изчил жорий этиш талаб этилади. Йўқса, соғлом рақобат муҳитига дош бериш мушкул. Юртимиз тадбиркорларининг замонавий ускуналар, инновацион технологияларга бўлган эҳтиёжи йил сайин ортиб бораётганининг боиси ҳам шунда. Ушбу талабни қондириш мақсадида тўқимачилик машинасозлигида дунёда етакчи ҳисобланган компаниялар кенг жалб қилинаётгани янги-янги субъектларнинг пайдо бўлишига қулай муҳит яратаётир.

Кўргазмада намойиш этилаётган маҳсулотлар Ўзбекистонимизда енгил саноатнинг жадал суръатларда ривожланаётгани, унинг бугунги ютуқлари ва янги истиқболи ҳақида яққол тасаввур уйғотади. Чунки бу ерда юртимизда фаолият кўрсатаётган кўплаб замонавий корхоналар томонидан таклиф қилинаётган турфа хилдаги тикувчилик ва тўқувчилик маҳсулотлари ўзининг юқори сифати билан бемалол рақобатга кириша олади. Шу боис маҳаллий ишбилармонларга ажратилган бўлмалар хорижлик мутахассислар билан гавжум. Улар уч кун давомида юртимизда чет эллик инвесторлар учун яратиб берилган шарт-шароит ва қулайликлар ҳақида атрофлича маълумот олиш, табиий пахта матоларидан тайёрланган либосларни тўғридан-тўғри харид қилиш борасида келишувларга эришиш имкониятига эгалар.

Саид РАҲМОНОВ,

«Халқ сўзи» мухбири.

Ҳасан ПАЙДОЕВ олган суратлар.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn