Ёш ўзбек олими —  халқаро мукофот соҳиби
  • 25 Апрель 2017

Ёш ўзбек олими —  халқаро мукофот соҳиби

Тошкент шаҳридаги Инҳа университетининг физика фани ўқитувчиси, профессор Ҳусниддин Олимов Халқаро Фанлар академияси (The World Academy of Science, TWAS)  мукофотига сазовор бўлган 22 нафар ёш олим қаторидан жой олди.

Айтиш жоизки, Ҳусниддин Олимовга мазкур мукофот сўнгги беш йилда физика фани бўйича чет эллардаги нуфузли журналларда чоп этилган мақолалари учун топширилди. Шу муносабат билан уюштирилган тадбирда Ўзбекистон Республикаси Фанлар академияси президенти Беҳзод Йўлдошев, Тошкент шаҳридаги Инҳа университети ректори Сарвар Бобохўжаев ва бошқалар мамлакатимизда илм-фан соҳаси ривожига қаратилаётган юксак эътибор юртимиз равнақига хизмат қилишини алоҳида -таъкидлашди. 

Ҳ. Олимов 2016 йил якунлари бўйича мазкур нуфузли мукофотни Ўзбекистондан қўлга киритган ягона номзоддир. Қайд этиш керакки, TWAS мукофоти дунёдаги 16 мамлакатдан қатнашган 22 нафар ёш олимга берилди. 

— Мана шундай нуфузли халқаро мукофот билан тақдирланганим, ўз навбатида, юртимиз илм-фани бутун дунёда яна бир бор эътироф этилганидан жуда хурсандман, — дейди ёш олим. — Ўзбекистон — иқтидорлар юрти. Шундай экан, вазифамиз буюк аждодларимизга муносиб издош бўлиб, Ватан равнақига муносиб ҳисса қўшишдир.

Халқаро Фанлар академиясига 1983 йилда асос солинган. TWAS Бош офиси Италиянинг Триесте шаҳрида жойлашган. Академия ҳар йили дунё олимларига фан ва инжиниринг бўйича турли соҳалардаги тадқиқотлар учун грант ажратади. 

Омонулла ФАЙЗИЕВ,

«Халқ сўзи» мухбири.

 

 

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn