Коллеж битирувчисининг орзуси ушалди
  • 04 Июль 2014

Коллеж битирувчисининг орзуси ушалди

Чирчиқ шаҳар тиббиёт коллежи битирувчиси Чарос Тоштаеванинг орзуси ушаладиган бўлди.

Маълумки, таълим муассасаларининг билимли ва қобилиятли ўқувчиларни аниқлаш, уларни ҳар томонлама қўллаб-қувватлаш ва рағбатлантиришда ҳар йили анъанавий тарзда ўтказиб келинаётган фан олимпиадаларининг ўрни беқиёс. Хусусан, яқинда академик лицейлар ва касб-ҳунар коллежлари ўқувчилари ўртасидаги фан олимпиадасининг бу йилги республика босқичи ўтказилди. Унда 418 нафар йигит-қиз қатнашди. Уларнинг таълим даргоҳида эгаллаган билим ва кўникмалари 15 фан бўйича ёзма ишлар ҳамда тест синовлари орқали чиғириқдан ўтказилди.
Ушбу интеллектуал баҳсларда муваффақиятли қатнашган Чарос Тоштаева биология фани бўйича тенгдошларидан устун эканлигини исботлади. Танловнинг барча ғолиблари қатори  у ҳам ўзи истаган олий таълим муассасасига тест синови ва қўшимча имтиҳонларсиз кириш ҳуқуқига эга бўлди.
— Қувончимнинг чеки йўқ, — дейди у. — Чунки коллежни тамомлагач, тиббиёт йўналишидаги олий таълим муассасасида таҳсилни давом эттириш ва келажакда малакали шифокор бўлишни ният қилганман. Орзуим ушала бошлаганидан жуда хурсандман.

 

Ғайрат ШЕРАЛИЕВ,
«Халқ сўзи» мухбири.

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn
Мазкур рукндаги бошқа мақолалар: « Имконият ва имтиёз Интилиш, билим, истиқбол »