Илм-фан фидойисига эҳтиром
  • 21 Октябрь 2017

Илм-фан фидойисига эҳтиром

Ўзбекистон Республикаси Вазирлар Маҳкамасининг шу йил 18 майдаги фармойиши билан мамлакатимизда академик Пўлат Ҳабибуллаев хотирасини абадийлаштиришга қаратилган қатор тадбирлар ташкил этилмоқда.

Ана шундай анжуманларнинг бири Ўзбекистон Республикаси Фанлар академиясида ўтказилди. Унда давлат ва фан арбоблари, академиклар, олимлар, олий ўқув юртлари профессор-ўқитувчилари ҳамда талабалар қатнашди.

Тадбирда юртимизда илм-фан соҳасини ривожлантириш, илмий ишланмаларни иқтисодиётнинг реал секторига татбиқ қилиш, олимлар, фан арбоблари ҳаёти, илмий меросини ўрганиш ва кенг тарғиб этишга алоҳида эътибор қаратилаётгани таъкидланди.

П. Ҳабибуллаев физика фани ривожига катта ҳисса қўшган эди. У акустик спектроскопия, физик ҳамда квант акустикаси, нанофизика ва юмшоқ муҳитлар физикаси, ночизиқли оптика ҳамда лазер термокимёси, суперион ўтказгичлар ва квант-ўлчамли тузилмалар физикаси, ядро физикаси ҳамда радиацион материалшунослик физикаси йўналишларида илмий мактаблар яратган.

Таниқли олим фаолияти давомида 500 дан ортиқ илмий мақолалар, 40 дан зиёд китоб ва монографиялар эълон қилди. Унинг бевосита илмий раҳбарлигида 200 нафардан кўпроқ фан номзодлари, 40 нафардан ортиқ фан докторлари етишиб чиқди. Улар бугунги кунда республикамизнинг фан соҳалари ҳамда турли ишлаб чиқариш корхоналарида фаолият юритмоқда.

— Устозимиз Ўзбекистон Фанлар академиясида Иссиқлик физикаси йўналишига тамал тошини қўйган эди, десак, айни ҳақиқат, — дейди ЎзФАнинг физика-математика ва техника фанлари бўйича вице-президенти, физика-математика фанлари доктори, профессор Сирожиддин Мирзаев. — Унинг раҳбарлигида илк бор радиактив изотоплар ишлаб чиқариш амалиётга жорий этилди. Натижада турли юқумли касалликларга ташхис қўйиш учун зарур бўладиган ноёб радионуклид дори технологияси яратилди ҳамда мамлакатимизда ана шундай маҳсулот ишлаб чиқариш йўлга қўйилди. Олим хотирасига бағишланган тадбирлар ҳамкасбларимизни унинг ҳаёти ва илмий фаолиятидан ибрат олишга ундайди, ёшларнинг илмга қизиқиши ҳамда меҳрини кучайтиради.

Тадбирда олимнинг ҳаёти ва илмий фаолиятига бағишланган ҳужжатли фильм намойиш қилинди.

Дилшод КАРИМОВ.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn