Ҳамид Олимжон ва Зулфия номи билан аталувчи мактаб-интернат иш бошлади
  • 05 Октябрь 2017

Ҳамид Олимжон ва Зулфия номи билан аталувчи мактаб-интернат иш бошлади

Жиззах шаҳрида она тили ва адабиёт фанларини чуқурлаштириб ўқитишга ихтисослаштирилган, юртимизнинг таниқли шоир ҳамда шоираси Ҳамид Олимжон ва Зулфия номи билан аталувчи янги бунёд этилган мактаб-интернат ўқувчиларни ўз -бағрига олди.

Мазкур билим даргоҳига вилоятнинг шаҳар ҳамда туманларидан тест синовлари асосида 120 нафар иқтидорли ўғил-қиз 5, 6, 7, 8-синфларга ўқишга қабул қилинди.

— Давлатимиз раҳбари жорий йилнинг 27 апрель куни вилоятимизга ташриф буюрганида, халқимизнинг шу ерда туғилиб камол топган атоқли намояндалари Ҳамид Олимжон ва Зулфия номи билан аталувчи мактаб-интернатни ташкил этишни тавсия қилгандилар, — дейди мактаб-интернат директори Сардор Расулов. — 2017 йил 23 июнда бу борада Вазирлар Маҳкамасининг тегишли қарори қабул қилинди. Ўтган қисқа вақтда, яъни беш ой мобайнида барпо этилган мактаб-интернат адабиётга иштиёқманд ёшларни ўз бағрига олиш билан бирга, биз, устозларга ҳам ҳақиқий туҳфа бўлди.

Тўрт қаватли қилиб қурилган замонавий мазкур бино атрофида кўркам адабиёт боғи ҳам яратилди. Бу ерда шинам синфхоналардан ташқари, 

100 ўринли ётоқхона, ошхона, фаоллар зали мавжуд. Ўқувчилар дарсдан бўш вақтларида спортнинг футбол, баскетбол, волейбол турлари билан шуғулланиш имкониятига эгадирлар.

Толибжон ЭРГАШЕВ,

«Халқ сўзи» мухбири.

 

Мақолани дўстларингиз билан бўлишинг!

Submit to FacebookSubmit to Google PlusSubmit to StumbleuponSubmit to TwitterSubmit to LinkedIn